अमोल कलये, साम टीव्ही | रत्नागिरी

चिपळूणमध्ये आज सकाळी धक्कादायक घटना घडली. एका नवविवाहित दाम्पत्यानं वशिष्ठी नदीत उडी मारून एकाच वेळी आयुष्य संपवण्याचा प्रयत्न केला. या घटनेनं शहरात खळबळ उडाली. काही महिन्यांपूर्वीच या दाम्पत्याचं लग्न झालं होतं.

नीलेश रामदास अहिरे आणि अश्विनी अशी या दोघांची नावे आहेत. या दोघांनी वशिष्ठी नदीत एकत्रितच उडी मारली. गांधेश्वर मंदिराजवळ ही घटना घडली. तरुणीचा पाण्यात बुडतानाचा व्हिडिओ सोशल मीडियावर व्हायरल झाल्यानंतर शहरात खळबळ उडाली होती.

चिपळूणमध्ये नीलेशचा मोबाइल शॉपी आहे. मागील आठ वर्षे तो चिपळूणमध्ये वास्तव्यास आहे. तो मूळचा धुळे येथील आहे. पागेवर भाडेपट्टीवर तो राहतो. काही महिन्यांपूर्वी अश्विनीसोबत त्याचं लग्न झालं होतं.

आज, बुधवारी सकाळी ते दोघेही मोटरसायकल घेऊन चिपळूणमधील गांधारेश्वर पुलावर आले. त्याठिकाणी दोघांमध्ये जोरदार बाचाबाची झाली. त्यानंतर पुन्हा ते दोघे मोटरसायकल घेऊन पुढे निघून गेले. काही वेळाने ते पुन्हा पुलावर आले. अश्विनी आणि नीलेशने एकाच वेळी पुलावरून नदीपात्रात उडी मारल्याची माहिती समोर येत आहे. या दोघांनी असे टोकाचे पाऊल का उचलले, याचं नेमकं कारण स्पष्ट झालेले नाही. एनडीआरएफ पथकाकडून या दोघांचा शोध घेण्यात येत आहे.

डॉक्टरच्या मुलानं मृत्यूला कवटाळलं

चिपळूण शहरातील वाणी आळी येथील एकता अपार्टमेंटमध्ये राहणाऱ्या ओवेस जुल्फीकार मुल्ला या २२ वर्षीय तरुणानं आत्महत्या केली. ओवेसचे वडील हे डॉक्टर आहेत. ओवेस हा घरातील शौचालयात गेला. बराच वेळ झाला तरी तो बाहेर आला नाही. त्यामुळं कुटुंबीयांना शंका आली. त्यांनी दरवाजा तोडला. ओवेसनं गळफास घेऊन आत्महत्या केल्याचे दिसून आले. ओवेस हा फार्मासीचं शिक्षण घेत होता. त्यानं कोणत्या कारणानं मृत्यूला कवटाळलं, हे अद्याप स्पष्ट झालेलं नाही.