सोलापूर : सोलापूरात (Solapur) पोलिसांकडे तक्रार घेऊन आलेल्या एका राजकीय पदाधिकाऱ्याला पोलिसांकडून अर्वाच्य भाषेत शिवीगाळ झाल्याचा प्रकार समोर आला आहे. बार्शी तालुक्यातील पांगरी पोलिस स्टेशनमध्ये (Pangri Police Station) हा प्रकार घडला असून तक्रार देण्यासाठी गेलेल्या नवाज सलीम मुलाणी या तक्रारदाराला पोलिसांनी अर्वाच्य भाषेत शिवीगाळकेल्याचा आरोप तक्रारदाराने पोलिसांवर केला आहे.

नवाज सलीम मुलाणी हा राष्ट्रवादी कॉंग्रेसचा (NCP) पदाधिकारी आहे. तर शिवीगाळ करणाऱ्या पोलिस कर्मचाऱ्याचे नाव तावसकर असे आहे. काल सायंकाळी ४ वाजता नवाज मुलाणी हा पांगरी पोलिस स्टेशनमध्ये तक्रार देण्यासाठी गेला होता मात्र, पोलिस स्टेशनमध्ये कोणीही नसल्याने मुलाणी याने वरिष्ठ पोलिस अधिकाऱ्यांना फोन केला.

फोन केल्यानंतर दोन तासांनी पोलिस कर्मचारी तिथे आले आणि त्यानंतर त्याने आपणाला शिवीगाळ केल्याचा आरोप तक्रारदार नवाज मुलाणी याने केला आहे. दरम्यान, पोलिसांनी (Police) शिवीगाळ करतानाची सर्व घटना मोबाईलमध्ये कैद झाली आहे. जर सत्ताधारी राजकीय पक्षाच्या पदाधिकाऱ्याला अशी वागणूक मिळत असेल तर सर्वसामान्य नागरिकांना कशी वागणूक मिळत असेल असा सवाल नवाज मुलाणी याने उपस्थित केला आहे.

Edited By - Jagdish patil