दोन्ही राष्ट्रवादीच्या विलिनीकरणावरून आमदार रोहित पवारांनी पत्रकार परिषदेत हा दावा केला...मात्र या पत्रकार परिषदेला काही तास उलटले आणि दादांच्या राष्ट्रवादीचे खासदार प्रफुल्ल पटेलांनी माध्यमांसमोर येत... विलिनीकरणाला स्पष्ट नकार दिला...त्यामुळे एकीकडे लेखी प्रस्ताव आल्यास विलिनीकरणाची चर्चा करू, असं विधान प्रदेशाध्यक्ष सुनील तटकरेंनी केलेलं असताना पटेलांच्या या नव्या भूमिकेनं एकच खळबळ उडालीये.

विलिनीकरणानंतर अमोल कोल्हेंना प्रदेशाध्यक्षपद देण्यात येणार होते, असा दावा रोहीत पवारांनी केलाय. तर दुसरीकडे विलिनीकरणाबाबत झालेल्या 14 बैठकींपैकी 11 बैठकीत सहभागी होतो, असा दावा खासदार कोल्हेंनी साम टिव्हीच्या विशेष मुलाखतीत केल्यानं राजकीय वर्तुळात चर्चांना उधाण आलंय.

विलिनीकरणाच्या चर्चेचा धुरळा उडाला असतानाच अजित पवारांच्या राष्ट्रवादीचे 12 आमदार शरद पवारांच्या पक्षाच्या संपर्कात असल्याची माहिती सूत्रांनी दिलीय...दोन्ही राष्ट्रवादीनं एकत्र यावं अशी या 12 आमदारांची इच्छा आहे. मात्र आमदारांची इच्छा असूनही दादांच्या पक्षातील प्रमुख नेत्यांकडून सकारात्मक भूमिका घेण्याऐवजी थेट विलिनीकरणालाच नकार दिला जात आहे. त्यामुळे भविष्यात दोन्ही राष्ट्रवादी एकत्र येणार की विलीनीकरणाच्या चर्चांना इथेच फुलस्टॉप लागणार? याकडे सगळ्यांचं लक्ष आहे.