'हा आमच्या पक्षातील प्रस्न आहे आम्ही तो आमच्या पद्धतीने सोडवू, असं विधान अजित पवार यांनी भुजबळांविषयी केलंय. गेल्या काही दिवसांपासून छगन भुजबळ नाराज आहेत. भुजबळांच्या नाराजीबाबत पहिल्यांदाच अजित पवार यांनी भाष्य केलं. छगन भुजबळ यांना महायुती सरकारच्या मंत्रिमंडळात स्थान मिळालं नाहीये. मंत्रिपद मिळालं नसल्यानं ते ओबीसी समाजातील संघटना, आघाड्या, संस्था यांच्या सभा, बैठका घेत आहेत.

भुजबळांनी आपली नाराजी अनेकवेळा बोलून दाखवलीय. मंत्रिमंडळातून डावलल्याने त्यांनी थेट अजित पवारांवर टीकादेखील केलीय. यावर अजित पवार पहिल्यांदाच बोलले आहेत. आपल्याला मंत्रिमंडळात घेतलं नाही या मागे काही गौडबंगाल आहे. तर दिल्लीत जाण्याची तयारी केली तेव्हा थांबवण्यात आलं. त्यानंतर राज्यसभेतही आपल्याला जाऊ दिलं नाही.

राज्यात आपली गरज आहे, त्यामुळे राज्यात लढावं असं म्हणत आपल्यात राज्यसभेवर जाऊ दिलं नाही. आतात राज्यातील मंत्रिमंडळात स्थान दिलं नाही, त्यामुळे आता आपली गरज संपली का असा सवाल छगन भुजबळ यांनी विचारला होता. त्यानंतर आज त्यांनी मुख्यमंत्री देवेंद्र फडणवीस यांची याबाबात भेट घेतली. यावेळी त्यांच्यासोबत समीर भुजबळ होते. आधीच छगन भुजबळ हे राष्ट्रवादी पक्षाला सोडचिठ्ठी देणार असल्याचं म्हटलं जात होतं.

त्यात त्यांनी मुख्यमंत्र्यांची भेट घेतल्याने त्या चर्चाला अधिक पेव फुटले. यानंतर अजित पवार यांनी छगन भुजबळ यांच्या नाराजीवर प्रतिक्रिया दिलीय. मंत्रिपदावरुन नाराजी आणि आज मुख्यमंत्र्यांना भेट देण्यावरून अजित पवारांना पत्रकारांनी प्रश्न केला. ओबीस संघटना, आणि आघाड्याच्या नेत्याशी चर्चा करत छगन भुजबळ दबाव तयार करत आहेत. त्याचच एक भाग म्हणून छगन भुजबळ यांनी मु्ख्यमंत्री फडणवीसांची भेट घेतली.

त्यावर बोलताना अजित पवारांनी एकाच वाक्यात उत्तर देत विषय संपवला. हा आमचा पक्षांतर्गत प्रश्न आहे, तो आम्ही आमच्या पद्धतीन सोडवू असं म्हणत अजित पवारांनी भुजबळांच्या नाराजीचा प्रश्न संपवला.

छगन भुजबळ भाजपमध्ये जाणार?

आज मुख्यमंत्री देवेंद्र फडणवीस यांची भेट घेतल्यानंतर छगन भुजबळ हे दिल्ली जाणार असल्याचं सांगितलं जात होतं. दरम्यान छगन भुजबळ राष्ट्रवादी काँग्रेस पक्ष सोडून भाजपमध्ये प्रवेश करणार असल्याची चर्चा आहे. इतकेच नाही तर त्यांच्या समर्थकांनीही त्यांना भाजपमध्ये जाण्याची गळ घातली होती.

त्यात आपल्याला लोकसभेला उमेदवारी देण्याबाबत पंतप्रधान आणि अमित शहा सकारात्मक होते. तसेच मंत्रिमंडळात घेण्यासाठी देवेंद्र फडणवीस आणि भाजप प्रदेशाध्यक्ष चंद्रशेखर बावनकुळे आग्रही होते. मात्र पक्षातून नकार होता असा खुलासाही भुजबळ यांनी केला होता. त्यात मंत्रिमंडळात भाजपच्या वाट्यातील एक जागा बाकी असल्याने छगन भुजबळ हे भाजपमध्ये जाऊन मंत्रिपद घेतील असं म्हटलं जात आहे.