विकास मिरगणे 

नवी मुंबई : नवी मुंबईच्या महापे परिसरात ट्रॅफिक विभागात कार्यरत असलेले कर्मचारी कर्तव्यावर असताना रस्त्याने आलेल्या हायड्रा वाहनाने जोरदार धडक दिली. या धडकेत ट्रॅफिक विभागातील कर्मचाऱ्याचा मृत्यू झाल्याची घटना घडली आहे. या घटनेने वाहतूक विभागात खळबळ उडाली असून वाहन चालकाविरुद्ध गुन्हा दाखल करत पुढील कारवाई करण्यात येत आहे. 

नवी मुंबईच्या महापे परिसरात ट्रॅफिक विभागात कार्यरत असलेले कर्मचारी गणेश आत्माराम पाटील असे अपघातात मृत झालेल्या कर्मचाऱ्याचे नाव आहे. गणेश पाटील हे आपले कर्तव्य बजावत असताना अचानक एका भरधाव हायड्रा क्रेन वाहनाने त्यांना जोरदार धडक दिली. या अपघातात ते गंभीररित्या जखमी झाले होते. तातडीने उपचारासाठी रुग्णालयात नेण्यात आले. मात्र डॉक्टरांनी त्यांना मृत घोषित केले.

वाहन चालकाविरुद्ध गुन्हा दाखल 

एका हायड्रा वाहनाच्या धडकेत दुर्दैवी मृत्यू झाल्याची घटना अत्यंत दु:खद आणि हृदय पिळवटून टाकणारी असून, संपूर्ण प्रशासकीय यंत्रणा आणि त्यांच्या सहकाऱ्यांमध्ये शोककळा पसरली आहे. दरम्यान या दुर्घटनेची चौकशी सुरू असून संबंधित वाहन चालकाविरुद्ध गुन्हा दाखल करण्यात आला असून पोलीस प्रशासनाकडून कायदेशीर कारवाई करण्यात येत आहे.

पावणे चार कोटींचा गुटखा जप्त 

नवी मुंबई गुन्हे शाखेच्या अंमली पदार्थ विरोधी पथकाने मोठी कारवाई केली असून तब्बल ३ कोटी ७७ लाख २८ हजार रुपये किमतीचा गुटखा जप्त केला आहे. तसेच कारवाईत चार आरोपींना अटक करण्यात आली आहे. गुप्त माहितीच्या आधारे २१ जुलै रोजी कामोठे येथे छापा टाकण्यात आला. त्यावेळी फरहान शेख (रा. कांदिवली, मुंबई) याच्याकडून २२.४० लाखांचा गुटखा व कंटेनर जप्त करण्यात आला. पुढील तपासात गुटखा भिवंडी येथून आणल्याचे निष्पन्न झाले. त्यानंतर येवई गावाजवळ छापा टाकण्यात आला. तेथे ४ कंटेनरमध्ये ३.५४ कोटींचा गुटखा साठा सापडला.