रश्मी पुराणीक

मुंबई : राज्यात सत्तांतर होऊन शिंदे-फडणवीस सरकार स्थापन झाले. एकनाथ शिंदे (Eknath Shinde) गटातील आमदारांनी बंडाचं निशाण फडकवल्याने महाविकास आघाडीचे सरकार (mva government) कोसळले. बंडखोर आमदारांच्या या राजकीय गुगलीचा सर्वात मोठा फटका शिवसेनेला बसला आहे. परंतु मविआत महत्वाचं घटकपक्ष असलेल्या राष्ट्रवादी कॉंग्रेसच्या गोटातही राजकीय हालचालींना वेग आला आहे. आगामी होणाऱ्या स्थानिक स्वराज्य संस्थांच्या निवडणुकांसाठी रणनीती आखण्यासाठी राष्ट्रवादी कॉंग्रेसने पक्षाचे अध्यक्ष शरद पवार (sharad Pawar) यांच्या नेतृत्वात उद्या १२ जुलैला राष्ट्रवादीच्या बैठकीचे (ncp meeting tomorrow) आयोजन करण्यात आले आहे. ही बैठक ११ वाजता यशवंतराव चव्हाण प्रतिष्ठान येथे होणार आहे.

राष्ट्रवादी कॉंग्रसचे राज्याचे मुख्य प्रवक्ते महेश तपासे यांनी दिलेली माहिती अशी की, राष्ट्रवादीची बैठक पक्षाचे सर्वेसर्वा शरद पवार यांच्या अध्यक्षतेखाली उद्या मंगळवारी होणार आहे. या बैठकीला प्रदेशाध्यक्ष जयंत पाटील, विरोधी पक्षनेते अजितदादा पवार, ज्येष्ठ नेते छगन भुजबळ यांच्यासह पक्षाचे नेते,पदाधिकारी,जिल्हाध्यक्ष, फ्रंटलचे पदाधिकारी उपस्थित राहणार आहेत. या बैठकीत आगामी स्थानिक स्वराज्य संस्थांच्या निवडणुका आणि सध्याच्या राजकीय परिस्थितीवर चर्चा करण्यात येणार आहे. तर १३ जुलै रोजी राष्ट्रवादी मुंबई विभागीय कॉंग्रेसचीही बैठक यशवंतराव चव्हाण प्रतिष्ठान येथे आयोजित करण्यात आली आहे.

Edited By - Naresh Shende