नाशिक : विधानसभा निवडणुकीच्या प्रचारानंतर राज्यात कालपासून अनेक घटना घडामोडी घडत असल्याचे पाहण्यास मिळत आहे. याचा दरम्यान नाशिकच्या देवळाली विधानसभा मतदारसंघातील वंचितचे उमेदवार अविनाश शिंदे यांच्या गाडीला अपघात झाल्याची घटना घडली आहे. मात्र हा घातपात असल्याचा आरोप शिंदे यांनी केला आहे.

विधानसभा निवडणुकीत आता चुरस वाढली आहे. प्रचार थांबल्यानंतर उमेदवार केवळ गाठीभेटी घेण्यावर भर देत आहेत. तर प्रचार संपल्यानंतर रात्री उमेदवार मतदारसंघातून घराकडे परतले. याच दरम्यान (Nashik News) नाशिकच्या देवळाली विधानसभा मतदारसंघातील वंचित बहुजन आघाडीचे उमेदवार अविनाश शिंदे हे रात्री आपल्या वाहनाने प्रचाराला जात असताना त्यांच्या वाहनाला अज्ञात वाहनाने मागून धडक (Accident) दिली. यात शिंदे यांच्या मणक्याला गंभीर दुखापत झाली आहे.  

दरम्यान प्रचाराला जात असताना मागच्या बाजूने एका अज्ञात वाहनाने शिंदे यांच्या गाडीला धडक दिल्याची त्यांची तक्रार आहे. यामुळे हा अपघात नसून घातपात असल्याचा आरोप अविनाश शिंदे यांनी केला आहे. सदर अपघातात शिंदे यांच्या मणक्याला गंभीर दुखापत झाली असल्याने त्यांना लागलीच नाशिकमधील खाजगी रुग्णालयात उपचारासाठी दाखल करण्यात आले असून त्यांच्यावर उपचार सुरु आहेत.