तबरेज शेख 
नाशिक : नाशिकच्या सातपूर परिसरामध्ये रविवारी रात्रीच्या सुमारास एका विवाहित महिलेने आत्महत्या केल्याची घटना घडली आहे. यामुळे खळबळ उडाली आहे. मात्र ही आत्महत्या नसून हत्या असल्याचा आरोप मयत महिलेच्या नातेवाईकांनी केला असून महिलेच्या पतीनेच हत्या केली असल्याचा आरोप करत रुग्णालयाच्या आवारात नातेवाईकांनी या पतीला चांगलाच चोप दिला. यामुळे जिल्हा रुग्णालयात गोंधळ उडाला होता. 

नाशिकच्या सातपूर परिसरामध्ये एका विवाहितेने गळफास घेत आत्महत्या केल्याची घटना रविवारी घडली आहे. या घटनेनंतर महिलेच्या नातेवाईकांमध्ये संतप्त भावना होत्या. मृतदेह नाशिक जिल्हा रुग्णालयात नेला असताना याठिकाणी महिलेच्या नातेवाईकांनी प्रचंड गोंधळ घातल्याचे पाहण्यास मिळाले. सदर महिलेने आत्महत्या केली नसून पतीनेच हत्या केली असल्याचा आरोप यावेळी नातेवाईकांनी केला. 

मारहाणीत डोक्याला गंभीर दुखापत 

हत्या केल्याच्या आरोप करत ३ मार्चला दुपारच्या सुमारास महिलेच्या नातेवाईकांनी महिलेच्या पतीला मारहाण करण्यात आली. मृत महिलेच्या नातेवाईकांनी केलेल्या मारहाणीत पतीच्या डोक्याला गंभीर दुखापत झाली असून त्याला जिल्हा रुग्णालयात उपचारासाठी दाखल करण्यात आले आहे. जिल्हा रुग्णालयाच्या आवारातच मारहाण झाल्याने प्रचंड गोंधळ उडाला होता. दरम्यान जिल्हा रुग्णालयाच्या सुरक्षा रक्षक आणि पोलिसांच्या मदतीने नातेवाईकांच्या तावडीतून सूडविल्याने पतीच जीव वाचविण्यात आला आहे. 

घटना सीसीटीव्ही कॅमेरात कैद 

जिल्हा रुग्णालयात ३ मार्चला दुपारच्या सुमारास मारहाणीची घटना जवळच असलेल्या सीसीटीव्हीमध्ये कैद झाली आहे. या प्रकरणी पोलिसांचा तपास सुरु आहे. मात्र या घटनेबाबत पोलीस ठाण्यात अद्याप कोणत्याही प्रकारचा गुन्हा दाखल करण्यात आलेला नाही. तरी महिलेने टोकाचा निर्णय कोणत्या कारणाने उचलला याचा तपास पोलिस करत आहेत.