तबरेज शेख

नाशिक : नाशिकरोड भागातील सामनगाव रोड परिसरात आरपीएफ सेंटर (Nashik) असून या सेंटर जवळच एसबीआय बँकेचे एटीएम (ATM) आहे. या ठिकाणी मध्यरात्रीनंतर चार वाजेच्या सुमारास चोरट्यांनी एटीएम फोडण्याचा प्रयत्न केला. मात्र, तो यशस्वी होत नसल्याने चोरट्यांनी थेट एटीएम मशीनच चोरून नेल्याची धक्कादायक घटना घडलीये. ही संपूर्ण घटना (CCTV) सीसीटीव्ही मध्ये कैद झाली. (Latest Marathi News)

सध्या पावसाळ्याचे दिवस असल्याने मध्यरात्रीच्या सुमारास रस्त्यावर शुकशुकाट असतो. त्यामुळे या संधीचा फायदा घेत सामनगाव रोड परिसरात असलेल्या आरपीएफ सेंटर जवळील एटीएमच चोरट्यांनी चोरून नेले आहे. सदरची घटना सकाळी नागरिकांना समजताच त्यांनी याबाबत पोलिसांना माहिती दिली. त्यानंतर तातडीने नाशिकरोड पोलिसांचे पथक घटनास्थळी दाखल झाले.

सीसीटीव्‍ही फुटेजच्‍या आधारे तपास सुरू

तेथील सीसीटीव्ही फुटेज तपासले असता त्यामध्ये एक पिकअप व स्विफ्ट डिझायर गाडी परिसरातून जाताना दिसली. यानंतर पोलिसांनी सीसीटीव्ही फुटेजच्या आधारे तपास सुरू केला असून या एटीएममध्ये किती रक्कम होती याबाबत अद्याप निश्चित आकडा समजू शकलेला नाही. मात्र एटीएम चोरणाऱ्या संशयतांचा पोलीस शोध घेत आहे.