नाशिकचा भोंदू बाबा अशोक खरातबाबत दररोज नवनवीन माहिती समोर येत आहे. भोंदू खरातच्या पापाचा घडा आता पूर्ण भरला आहे. त्याच्या विरोधात आतापर्यंत एकूण १० गुन्हे एफआयआर दाखल करण्यात आले आहेत. अजूनही SIT कडून खरातची चौकशी सुरु आहे. या तपासातून असे समोर आले की, वासनेचा नंगा नाच करताना खरात 'कोडवर्ड' वापरायचा आणि हे कोड वर्ड त्याच्याकडे काम करणाऱ्या कर्मचाऱ्यांना माहित होते. धक्कादायक म्हणजे एखाद्या महिलेला शुद्धीकरणासाठी आपल्या केबिनमध्ये बोलावल्यानंतर केबिनमधील झुंबराचा दिवा बंद करायचा.

भोंदू अशोक खरातने आतापर्यंत १५० हुन अधिक महिलांचं लैंगिक शोषण केलं आहे. हे काळे धंदे करताना कोणालाही कळू नये यासाठी त्याने काही कोड वर्डची रचना केली होती. त्याच्या कार्यालयात वेगवेगळ्या कामांसाठी एका विशेष कोड वर्डचा तो वापर करायचा. याबद्दल त्याच्या कर्मचाऱ्यांना देखील माहिती होती.

तसेच खरात त्याच्या केबिनमध्ये महिलांचे लैगिक शोषण करायचा. अत्याचाराआधी तो केबिनच्या बाहेर असलेल्या झुंबराचा दिवा बंद करायचा. या झुंबराचा दिवा बंद असेपर्यंत खरातच्या केबिनमध्ये कोणालाही प्रवेश नसायचा. कार्यालयात काम करणाऱ्यांना या कोडवर्डची माहिती असल्याने ते देखील आत प्रवेश करायचे नाहीत. इतकेच नव्हे, तर व्यवसायातील अडथळे दूर करण्याच्या नावाखाली लाखो रुपयांची फसवणूक करण्यासाठी तो 'अवतार पूजा' या शब्दाचा सांकेतिक भाषेत वापर करायचा अशी माहिती तपासात समोर आली आहे.

तपासात असेही उघड झाले आहे की, आरोपी खरात हा 'तुर्कीमधील गुहेतून आणलेला दुर्मिळ जादुई मध' असल्याचा दावा करून भक्तांना जादुई तुर्की मध विकत होता आणि तो लोकांना प्रति किलोग्राम १५ लाख रुपये विकायचा. दरम्यान, खरात प्रकरणात आता पर्यंत १० गुन्ह्यांची नोंद झाली असून आता या प्रकरणात खरातचा पाय आणखी खोलात जाण्याची शक्यता आहे.