नंदुरबार : जिल्ह्यातील पोटनिवडणुकीत जिल्हा परिषदेत काँग्रेस– शिवसेना आघाडीने सत्ता कायम राखली. तर शहादा, नंदुरबार पंचायत समितीमध्ये सत्तांतर झाले आहे. (nandurbar-news-zp-election-shiv-sena-congress-Continuity-in-Zilla-Parishad)

ओबीसी आरक्षणामुळे रद्द झालेल्या रिक्त पदांसाठी जिल्हा परिषदेचे ११ गट व पंचायत समितीच्या १४ गणांमध्ये निवडणूक पार पडली. जिल्हा परिषदेत काँग्रेस– शिवसेना आघाडीने सत्ता कायम राखली आहे. तर शहादा आणि नंदुरबार पंचायत समितीमध्ये सत्तांतर झाले आहे. या दोन्ही पंचायत समिती भाजपच्या ताब्यात होत्या. शहादा पंचायत समिती काँग्रेसने वर्चस्व मिळवले आहे. तर नंदुरबार पंचायत समितीत शिवसेनेने वर्चस्व मिळवले आहे.

२०१९ च्‍या निवडणुकीतही वर्चस्‍व

नंदुरबार जिल्हा परिषदेत एकूण ५६ सदस्यत्व असून २०१९ मध्ये झालेल्या निवडणुकीत काँग्रेसचे २३, शिवसेनेचे ७, भाजपचे २३, राष्ट्रवादीचे ३ असे संख्याबळ होते. सत्तास्थापनेसाठी २८ सदस्यांची गरज असताना शिवसेना- काँग्रेसने आघाडी करुन ३० संख्याबळावर सत्ता स्थापन केली होती. यामध्ये काँग्रेस पक्षाचे अध्यक्ष आणि शिवसेनेचे उपाध्यक्ष पद माजी आमदार चंद्रकांत रघुवंशी यांचे पुत्र राम रघुवंशी यांच्याकडे होते. परंतु त्यांचे पद रद्द झाल्यामुळे त्यांना निवडणुकीला सामोरे जावे लागले होते.

भाजपचे संख्‍याबळ झाले कमी

पोटनिवडणुकीतील अकरा गटांपैकी काँग्रेसने ३, भाजपने ४, शिवसेनेने ३ आणि राष्ट्रवादीने १ जागेवर विजय मिळवला असून जिल्हा परिषदेतील ५६ जागांपैकी पक्षीय बलाबल आकडेवारी कांग्रेस २४, शिवसेना ८, भाजप २०, राष्ट्रवादी ४ असे संख्याबळ झाले आहे. यात काँग्रेस आणि शिवसेनेच्या एकूण ३१ सदस्यांचे संख्याबळ करून सत्ता कायम ठेवली आहे.