नंदुरबार : जिल्ह्यातील नवापूर, शहादा, अक्कलकुवा आगारात मध्यरात्रीपासून कर्मचाऱ्यांनी संप पुकारल्याने प्रवाशी वाहतूक सेवा बंद होती. मात्र नंदुरबार आगारातून सकाळी अंशतः एसटी प्रवासी वाहतूक सुरू होती. दुपारी कर्मचाऱ्यांनी अचानक संप पुकारल्याने प्रवाशांचे हाल झाले आहेत. सकाळी गावावरून शहरात आलेल्या नागरिकांना पुन्हा घरी जायला असुविधा निर्माण झाली आहे. (Nandurbar-news-ST-workers strike-condition-of-passengers)

प्रवाशांची होतेय लुट

सरकारी बस बंद असल्याने खाजगी प्रवाशी वाहतुक दारांकडून अव्‍वाच्या सव्वा भाडे आकारून प्रवाशाची लूट सुरू आहे. परंतु, गावी जाण्यासाठी बाहेर पडल्‍यामुळे प्रवाशांचा नाईलाज होत आहे. जास्‍तीचे भाडे देवून प्रवास करावा लागत आहे. त्यामुळे शासनाने एसटी कर्मचाऱ्यांच्या समस्या लवकर सोडवून गैरसोय टाळावी अशी मागणी प्रवाशांनी केली आहे.

शहाद्यातही बंद

महाराष्ट्र शासनाने एसटी कर्मचाऱ्यांना राज्य शासकीय कर्मचाऱ्यांप्रमाणे वेतन अदा करावे, शासकीय कर्मचाऱ्यांमध्ये विलीनीकरण करून न्याय द्यावा या प्रमुख मागणीसाठी नंदुरबार जिल्ह्यातील शहादा आगारातही एसटी कर्मचाऱ्यांनी एकजुटीने काम बंद आंदोलन सुरू केले आहे. अक्कलकुवा, नवापूर आगारातील कर्मचाऱ्यांचेही आंदोलन सुरु आहे. राज्य शासनाने आतातरी आमच्या मागण्या मान्य कराव्या. एसटी कर्मचाऱ्यांना योग्य न्याय द्यावा अशी मागणी शहादा आगारातील आंदोलनाला बसलेल्या कर्मचाऱ्यांनी केली आहे. जोपर्यंत आमच्या मागण्या पूर्ण होत नाही तोपर्यंत आंदोलन सुरूच ठेवण्याचा इशाराही आंदोलनकर्त्यांनी दिला आहे.