सागर निकवाडे

नंदूरबार : नंदूरबार जिल्ह्यात पुरातन मंदिर, मुर्ती आणि प्राचीन वस्तू सापडणे; हे काही नवीन नाही. यातच जिल्ह्यातील शहादा (Shahada) शहरातील कुकडेल भागात शनि मंदिराच्या मागच्या बाजूला पुरातन भावसार समाज मढीचा जागेवर खोदकाम करताना समाधी वजा शिवलिंग, चबुतरा आणि पादुका आढळून आले आहे. याठिकाणी भाविकांनी दर्शनासाठी गर्दी केली होती. (Maharashtra News)

शहाद्यातील कुकडेल हा परिसर प्राचिन ऐतिहासिक व धार्मिक भाग समजला जातो. प्रकाशा येथे देखील टेकडीवर खोदकाम करताना मूर्ती सापडली होती. याचसोबत शहरापासून १३ किलोमीटर अंतरावर पाडळदा गावात जुने घराचे बांधकाम करीत असताना त्या ठिकाणी पुरातन तोफा आढळून आल्या आहेत. यामुळे शहादा परिसरात ऐतिहासिक धार्मिक याबाबतच्या अनेक गोष्टींना इथे उजाळा मिळत आहे.

भाविक करत आहेत गर्दी

शहरातील कुकडेल परिसरातील शनि मंदिराच्या मागे खोदकाम करीत असताना मंदिराचा चबुतरा, शिवलिंग, समाधी आढळून आलेली आहे. ही चर्चा शहरात वाऱ्यासारखी पसरतात शहर व परिसरातील भाविक महिला मोठ्या संख्येने या ठिकाणी दर्शनासाठी गर्दी करत आहे.