सागर निकवाडे 
नंदुरबार : मागील दीड महिन्यांपासून वेतन थकले असून दिवाळीसारख्या सणाच्या उत्सवात देखील पगार न झाल्याने शहादा नगरपालिकेच्या स्वच्छता विभागातील कर्मचाऱ्यांनी आजपासून कामबंद आंदोलन सुरू केले आहे. ऐन दिवाळीत स्वच्छता कर्मचाऱ्यांनी काम बंद आंदोलन पुकारल्याने शहरात अस्वच्छता पसरण्याची शक्यता निर्माण झाली आहे. 

नंदुरबार जिल्ह्याच्या शहादा नगरपालिकेत स्वच्छता विभागात काम करत असलेल्या सर्वच कर्मचाऱ्यांच्या पगाराचा प्रश्न निर्माण झाला आहे. विशेष म्हणजे गेल्या आठ महिन्यांपासून टेंडर प्रक्रिया पूर्ण झाली आहे. या नंतरही कर्मचाऱ्यांच्या पगाराचा प्रश्न सुटलेला नाही. एस. आर. ग्रीनवे एंपियर नाशिक या संस्थेकडे स्वच्छता विभागाचे टेंडर गेल्यापासून कर्मचाऱ्यांना वारंवार पगारात विलंब होत आहे. कर्मचाऱ्यांना उशिराने पगार दिला जात आहे. 

दीड महिन्यांपासून पगार थकला 

आता देखील मागील दीड महिन्यापासून एकाही कर्मचाऱ्याला पगार मिळालेला नाही. त्यामुळे दीपावलीच्या तोंडावरच त्यांची आर्थिक अडचण निर्माण झाली आहे. दिवाळीचा बाजार देखील पगार नसल्याने होऊ शकलेला नसल्याचे कर्मचाऱ्यांचे म्हणणे आहे. यामुळे आजपासून शहरातील सर्व स्वच्छता कामकाज ठप्प झाले असून अनेक भागांत कचरा साचू लागला आहे. त्यामुळे नागरिकांमध्ये अस्वच्छतेबाबत नाराजी व्यक्त केली जात आहे.

तोडगा काढण्याची मागणी 

आंदोलनामुळे नगरपालिका प्रशासनावर मोठा ताण निर्माण झाला आहे. नागरिकांनी प्रशासन आणि ठेकेदार संस्थेने तात्काळ हस्तक्षेप करून कर्मचाऱ्यांचा पगाराचा प्रश्न मार्गी लावावा, अशी मागणी केली आहे. अन्यथा शहरात अस्वच्छतेची परिस्थिती आणखी गंभीर होण्याची शक्यता आहे. अर्थात ऐन दिवाळीत शहरात स्वच्छता पसरण्याची शक्यता आहे.