नंदुरबार : पक्षातील अंतर्गत कलाहामुळेच भाजपचा पराभव झाला असुन पक्षातील जिल्हा परिषद सदस्य, आमदार आणि पदाधिकारी यांच्या नसत्या उद्योगामुळेच जिल्ह्यात भाजपला पराभवाचा धक्का सहन करावा लागत असल्याचा आरोप भाजप आमदार डॉ. विजयकुमार गावितांनी केला आहे. (nandurbar-news-nandurbar-zp-election-result-bjp-leader-vijaykumar-gavit-reation)

जिल्‍हा परिषदेमध्ये आजच्या निकालानंतर भाजपला ४ जागांवरच समाधान मानावे लागले आहे. गत वेळेस या ११ पैकी ७ जागांवर भाजप उमेदवार विजयी झाले होते. तर दुसरीकडे शहादा आणि नंदुरबार पंचायत समितीमध्ये देखील भाजपला झालेल्या पिछेहाटनंतर या दोन्ही पंचायत समितींवर भाजपची सत्ता राहील असा अजब दावा देखील त्यांनी केला आहे.

त्‍यांना कोणत्‍याही उमेदवाराला विजयी करता आले नाही : रघुवंशी

नंदुरबार तालुक्‍यात पाच जागेवर निवडणुक होती. फक्‍त एका जागेवरच शिवसेनेचा निसटता पराभव झाला. परंतु, भाजप खासदार, आमदार, माजी आमदार असलेल्‍या गावित परिवाराला फक्‍त मुलीलाच विजयी करता आले. अन्‍य कोणत्‍याही उमेदवारांना निवडून आणू शकले नाही; असे मत चंद्रकांत रघुवंशी यांनी व्‍यक्‍त केले.