सागर निकवाडे

नंदुरबार : नंदुरबार नगरपालिकेच्या वतीने मालमत्ता कर वसुलीची विशेष मोहीम राबवली जात आहे. मालमत्ता कर थकबाकीदारांकडून वसूल करण्यात येत असून कर न भरणाऱ्यांवर कारवाई करण्यात येत आहे. या वसुली मोहिमेत नगरपालिकेकडून आतापर्यंत कर न भरणाऱ्या ३५ दुकानांना सील लावण्यात आले आहे. यात सर्वात मोठी कारवाई हि नाट्यगृहाला लावण्यात आलेल्या सीलची झाली आहे. 

मार्च एंडिंगच्या अनुषंगाने महापालिका व नागरपालकीकेकडून जोरदार वसुली मोहीम राबविण्यात येत आहे. प्रामुख्याने मोठ्या थकबाकीदारांवर कारवाई करत मालमत्ता कराची वसुली जोरात करण्यात आली आहे. त्यानुसारच नंदुरबार नगरपालिकेकडून देखील वसुली मोहीम सुरु करण्यात आली आहे. यात मागील आठवड्यात छत्रपती शिवाजी महाराज नाट्यगृहाला देखील सील लावण्यात आले आहे. 

पंधरा दिवसांपासून कारवाई सुरु 

गेल्या पंधरा दिवसात नंदुरबार शहरातील एकूण ३५ पेक्षा अधिक दुकाने पालिकेचे सिल केल आहे. अर्थात नगरपालिकेकडून मालमत्ता कर न भरणाऱ्यांना नोटीस दिली जात आहे. नोटीस देऊन देखील मालमत्ता कर न भरल्याने हि कारवाई करण्यात आली आहे. आता देखील नोटीस बजावल्यानंतर कर न भरणारी सर्व दुकाने सिल करण्यात येणार असल्याचा इशारा नगरपालिकेचे मुख्याधिकारी डॉ. पवन दत्ता यांनी दिले आहेत.

नाट्यगृहाला सील 

नगरपालिकेची मालमत्ता कर न भरलेल्या छत्रपती शिवाजी महाराज नाट्यगृहाला देखील सहा दिवसापासून सील करण्यात आले आहे. दरम्यान नाट्यगृहात कार्यक्रम घेण्यासाठी काही जणांनी आगाऊ बुकिंग करून ठेवलेले होते. मात्र नाट्यगृहाला सील लागल्याने आता नाट्य मंदिरात आयोजित सर्व कार्यक्रम आता रद्द करण्यात आल्याने आयोजकांचे चांगलेच हाल झाले आहे.