सागर निकवाडे 

नंदुरबार : विधानसभेच्या रणधुमाळीत राज्यातील अनेक मतदार संघात उमेदवारी निश्चित होऊन उमेदवारांनी अर्ज भरत प्रचाराला देखील सुरवात केली आहे. तर काही मतदारसंघातील तिढा अद्याप सुटलेला नाही. यातील नंदुरबार जिल्ह्यातील अक्कलकुवा- अक्राणी मतदारसंघात महायुतीचा उमेदवार अद्याप ठरलेला नाही.

विधानसभा निवडणुकीत यंदा महाविकास आघाडी विरुद्ध महायुती (Mahayuti) अशीच प्रमुख लढत पाहण्यास मिळत असली तरी बंडखोरीमुळे काट्याची टक्कर होणार असल्याचे पाहण्यास मिळणार आहे. मात्र काही मतदारसंघात अद्याप उमेदवारीचा तिढा सुटलेला पाहण्यास मिळत आहे. यात (Akkalkuwa) अक्कलकुवा- अक्राणी या मतदारसंघात महायुतीचा तिढा कायम आहे. उमेदवार ठरत नसल्याने महायुतीतील तिन्ही पक्षांमधील कार्यकर्त्यांमध्ये संभ्रम अवस्था निर्माण झालेली आहे.  

जागा शिवसेनेला 

अक्कलकुवा- अक्राणी मतदारसंघाची हि जागा शिवसेना शिंदे गटाला सुटलेली आहे. मात्र गेल्या अनेक दिवसांपासून या जागेवर तिढा कायम असल्याचे पाहायला मिळत आहे. शिंदे गटाचे जिल्हा परिषद सदस्य विजयसिंग पराडके हे या जागेसाठी इच्छुक असून त्यांच्या वतीनं विधानसभेची तयारी पूर्ण करण्यात आली आहे. मात्र उमेदवारी जाहीर होत नसल्याने संभ्रम अवस्था निर्माण झालेली आहे.