नंदुरबार : महाविकास आघाडीतील घटक पक्षांपैकी शिवसेना आणि राष्ट्रवादीने जिल्ह्यात बंदसाठी पुढाकार न घेतल्याने काँग्रेसने नाराजी व्यक्त केली आहे. (nandurbar-news-maharashtra-bandh-Congress-displeased-with-Shiv-Sena-NCP)

उत्तर प्रदेशातील शेतकरी हत्येच्या घटनेच्‍या निषेधार्थ महाविकास आघाडीने पुकारलेल्या बंदला नंदुरबार जिल्ह्यात काँग्रेस व्यतिरिक्त राष्ट्रवादी आणि शिवसेनेने पूर्णता पाठिंबा न दिल्याने काँग्रेस पक्षाचे जिल्हा कार्याध्यक्ष दिलीप नाईक यांनी नाराजी व्यक्त केली आहे. जिल्ह्यातील अक्कलकुवा, नवापूर, तळोदा, शहादा या तालुक्यांमध्ये काँग्रेसने पुढाकार घेऊन बंद यशस्वी घडवून आणला.

शिवसेनेचे वर्चस्‍व तरीही..

नंदुरबार शहरात शिवसेनेचे वर्चस्व असल्याने शिवसेना व राष्ट्रवादीने पुढाकार न घेतल्याने नंदुरबार शहरातील बाजारपेठा अंशतः खुल्या दिसून आल्या. तर दुर्गम भागातील धडगाव येथे आठवडी बाजार असल्यामुळे खेड्या पाड्यावरून येणाऱ्या नागरिकांची गैरसोय होऊ नये; यासाठी सकाळी दहा वाजेपर्यंत दुकाने बंद ठेवून बंदमध्ये सहभागी झाल्यानंतर दुपारून बाजारपेठा सुरू ठेवल्या आहेत. नवापूर, तळोदा, शहादा व नंदुरबार येथे काँग्रेस पक्षाच्यावतीने प्रशासनाला निवेदन देऊन उत्तर प्रदेश येथील शेतकरी हत्येच्या घटनेच्या निषेध व्यक्त करण्यात आला.