सागर निकवाडे 
नंदुरबार : नवापूर तालुक्यात मध्यरात्रीच्या सुमारास झालेल्या मुसळधार पावसामुळे जनजीवन विस्कळीत झालेले आहे. या पावसामुळे नवापूर शहरात असलेल्या एका इस्लामपुरात देवल्फळी भागात असलेल्या घरांमध्ये आठ फुटांपर्यंत पाणी गेले होते. यामुळे घरातील संसार उपयोगी साहित्य संपूर्ण पावसात भिजल्याने नागरिकांचे मोठ्या प्रमाणात नुकसान झाले आहे. 

राज्यात सर्वत्र पावसाचा जोर वाढलेला आहे. (Heavy Rain) मुसळधार पाऊस होत असल्यामुळे अनेक ठिकाणी पूरजन्य परिस्थिती निर्माण झाली आहे. यामुळे जनजीवन विस्कळीत झाले आहे. दरम्यान नंदुरबार जिल्ह्यातील नवापूर शहर व तालुक्यात मध्यरात्रीच्या सुमारास अचानक जोरदार पाऊस आला, रात्रीच्या या पावसामुळे प्रचंड नुकसान झाले आहे. यामुळे सुरत- भुसावळ रेल्वे सेवा देखील विस्कळीत झाली आहे. तर धुळे- सुरत महामार्गावर देखील पावसामुळे वाहतूक ठप्प झाली आहे. तर नवापूर शहराच्या (Nandurbar) अनेक भागातील घरात पाणी शिरले आहे. 

महिलांचे अश्रू अनावर 

मध्यरात्रीच्या सुमारास आलेल्या मुसळधार पावसामुळे जनजीवन विस्कळीत झाले आहे. पाण्यामुळे दाणादाण उडाली असून नवापूर (Navapur) शहरातील अनेक भागात घरांमध्ये पुराचे पाणी शिरले होते. काही घरांमध्ये तर अगदी सात ते आठ फुटापर्यंत पाणी शिरले होते. यामुळे नागरिकांनी मध्यरात्री आपला जीव वाचवून बाहेर पडले. मात्र यामुळे संसारोपयोगी साहित्याचे नुकसान झाले आहे. या घटनेची माहिती देताना महिलेला अश्रू अनावर झाले होते.