सागर निकवाडे 
नंदुरबार : सातपुड्यातील सर्वोच्च शिखर असलेल्या अश्वस्थामा ऋषी यात्रोत्सवाला सुरुवात झाली आहे. याठिकाणी दर्शनासाठी भाविक जात आहेत. अशाच प्रकारे दर्शनासाठी गेलेल्या तरुणाला अचानक भोवळ आल्याने तो उंच शिखरावरून खोल दरीत पडला. यात त्या तरुणाचा मृत्यू झाल्याची घटना घडली आहे. 

नंदुरबार (Nandurbar) जिल्ह्यातील सातपुड्यातील सर्वोच्च शिखर असलेल्या अश्वस्थामा ऋषी यात्रोत्सवाला सुरुवात झाली आहे. डोक्यावर कळस घेऊन आणि विविध प्रकारच्या वेशभूषा साकारत ढोल ताशाचा गजरात वाजत गाजत आदिवासी बांधव अस्तंबा ऋषीच्या दर्शनासाठी जात असतात. आपल्या शेतात पिकवलेलं नवं धान्य अस्तंबा ऋषीला नैवेद्य दाखवल्यानंतर धान्य कापणीला आदिवासी बांधव सुरुवात करत असतात. या यात्रोत्सवाला नंदुरबार जिल्ह्यासह गुजरात आणि मध्य प्रदेशातील (Madhya Pradesh) हजारो तरुण पदयात्रा करत अस्तंबा ऋषींच्या दर्शनासाठी शिखरावर रवाना होत असतात. 

अशाच प्रकारे अस्तंबा ऋषीच्या यात्रोत्सवादरम्यान दर्शनासाठी शिखरावर तरुण गेला होता. शिखरावर चढल्यानंतर त्या तरुणाला अचानक भोवळ आल्याने तो उंच शिखरावरून खोल दरीत पडला. यात त्याचा मृत्यू झाला. निखिल वाडीले असे या मृत तरुणाचे नाव असून शहादा तालुक्यातील रहिवासी असल्याची माहिती समोर आली आहे. खोल दरीत पडलेला या तरुणाचा मृतदेह बाहेर काढण्यात आला असून धडगाव पोलीस ठाण्यात आकस्मित मृत्यूची नोंद करण्यात आली.