सागर निकवाडे 

नंदुरबार : विधानसभा निवडणुकीसाठी इच्छुकांची भाऊगर्दी सुरु असताना अर्ज दाखल करण्यास सुरवात झाली आहे. याच दरम्यान महायुतीतील शिवसेना व भाजपकडून जागा वाटप झाल्या असून काही ठिकाणी अजूनही संभ्रमावस्था आहे. यात नंदुरबार जिल्ह्यातील अक्राणी- अक्कलकुवा या मतदारसंघाच्या जागेवरून महायुतीत ठिणगी पडण्याची शक्यता वर्तविली जात आहे. 

नंदुरबार (Nandurbar) जिल्ह्यातील चार विधानसभा पैकी क्षेत्रापैकी अक्राणी- अक्कलकुवा विधानसभा क्षेत्रावर शिवसेना शिंदे गटाने आपला दावा केला असून त्या दृष्टीने कामाला सुरुवात केली आहे. मात्र गेल्या अनेक दिवसांपासून याच विधानसभा क्षेत्रावर (BJP) भाजपच्या हिना गावित या देखील तयारी करत असल्याने महायुतीत वाद होण्याची शक्यता निर्माण झाली आहे. या जागेवर तिकीट कोणाला मिळेल हे स्पष्ट झाल्यानंतर येथील पुढील समीकरण अवलंबून आहे.  

दरम्यान अक्राणी- अक्कलकुवा विधानसभेची जागा शिवसेनेला मिळते कि भाजपला ही जागा मिळते? हे पाहणं महत्त्वाचं असणार आहे. यातच शिवसेना शिंदे गटाचे जिल्हा परिषद सदस्य विजयसिंह पराडके हे गेल्या अनेक दिवसांपासून विधानसभेची तयारी करत आहेत. मात्र शिवसेनेने जाहीर केलेल्या पहिल्या यादीत त्यांचं नाव न आल्यामुळे आता संभ्रम निर्माण झालेला आहे. मात्र दुसरीकडे या जागेवरून आता महायुतीत वाद निर्माण होण्याची शक्यता आहे.