नंदुरबार : गेल्या सप्टेंबर महिन्यात ९९२ बालकांच्या जन्मापैकी ० ते ६ महिने वयोगटातील ११८ बालकांचा मृत्यू झाले आहेत. या नोंदीने कुपोषणाचा प्रश्न पुन्हा ऐरणीवर आला आहे. आता जिल्हा दौऱ्यावर असलेल्‍या पंचायती राज समिती सदस्य कुपोषणाची दखल घेतील का? असा प्रश्‍न देखील निर्माण होत आहे. (nandurbar-news-118-deaths-out-of-992-child-births-in-a-month-picture-of-Nandurbar-district)

महाराष्ट्रातील सर्वात अतिदुर्गम भागात असलेल्या नंदुरबार जिल्ह्याला लागलेला कुपोषणाचा कलंक पुसण्यासाठी शासनाच्या माध्यमातून कोट्यावधी रुपये खर्च केले जातो. असे असले तरी योजना राबविण्यासाठी असलेली यंत्रणा भ्रष्टाचारात मग्न असल्याने प्रत्यक्ष लाभार्थ्यांपर्यंत योजना पोहोचत नसल्याचे चित्र वारंवार पाहायला मिळते.

राज्‍यपालांचे दत्‍तक गाव तरीही..

सातपुडा अतिदुर्गम भागातील अक्कलकुवा तालुक्यातील भगदरी हे गाव राज्यपालांचे दत्तक गाव असतानाही या ठिकाणी असलेली महिला बाल विकास विभागाची यंत्रणा तत्परतेने काम करत नसल्याचा गावकऱ्यांचा आरोप आहे. विशेष म्हणजे नंदुरबार जिल्ह्यातील महिला बालविकास विभागाच्या १२ प्रकल्पांमध्ये सप्टेंबर महिन्यात ९९२ बालकांचा जन्म झाल्याची नोंद असून सप्टेंबर महिन्यात ० ते ६ वयोगटातील ११८ बालकांच्या मृत्यूसह ६ मातांचाही मृत्यू झाल्याची गंभीर बाब समोर आली आहे.

यंत्रणेच्‍या कामकाजावर प्रश्‍नचिन्‍ह

विशेष म्हणजे सप्टेंबर महिन्यातील नवजात बालकांच्या मृत्यूत दुर्गम भागापेक्षा सपाटी भागातील नवापूर तालुक्यातील बाल विकास प्रकल्पात सर्वाधिक २२ नवजात बालकांचा मृत्यू झाल्याने महिला बाल विकास विभागाची संपूर्ण यंत्रणा नेमके काय करतेय असा प्रश्न उपस्थित होत आहे. नंदुरबार जिल्ह्यातील कुपोषणाच्या प्रश्नावर जिल्हा दौऱ्यावर असलेले पंचायती राज समितीचे सदस्य नेमकी काय भूमिका घेतात याकडे सर्वांचे लक्ष लागून आहे.