सागर निकवाडे
नंदुरबार : नवापूर तालुक्यातील जाणाऱ्या राष्ट्रीय महामार्गावर सकाळच्या सुमारास भीषण दुर्घटना घडली. या घटनेत भरधाव ट्रकने रस्त्याने जाणाऱ्या मेंढ्यांना चिरडले. या घटनेत शंभरहून अधिक मेंढ्यांच्या मृत्यू झाला आहे. यामध्ये मेंढपाळाचे मोठे नुकसान झाले आहे.

धुळ्याच्या साक्री तालुक्यातील विजापूर येथील मेंढपाळ विसरवाडीच्या दिशेने गुजरात राज्यात मेंढ्या घेऊन निघाले होते. मेंढपाळ (Nandurbar) नंदुरबार जिल्ह्यातील नवापुरमधून गेलेल्या राष्ट्रीय महामार्गाने जात असताना आंध्र प्रदेश राज्यातील असलेल्या भरधाव वेगात आलेल्या ट्रकने मागून मेंढ्यांमध्ये घुसला. यात शंभरहून अधिक मेंढ्या चिरडल्या गेल्या आहेत. त्यात काही गर्भवती मेंढ्या देखील होत्या.

लाखो रुपयांचे नुकसान
भरधाव वेगाने रस्त्यावर जात असलेल्या मेंढ्यांना चिरडल्याची घटना घडली. या घटनेमुळे परिसरात मोठी खळबळ उडाली. या घटनेमुळे मेंढपाळांचे लाखो रुपयांचे नुकसान झाले आहे. ट्रक चालकास विसरवाडी पोलिसांनी ताब्यात घेतले आहे.