दिनू गावित

नंदुरबार : नापास होण्याच्या भीतीने महाविद्यालयीन विद्यार्थिनींनी तापी पुलावरून उडी मारून आत्महत्या करण्याचा प्रयत्न केला. युवती घरून बसमध्ये बसून निझर तालुक्यातील वेलदा टाकी जवळ उतरली तेथून चालत चालत जुना कुकरमुंडा जवळील तापी नदीच्या पुलावर गेली. 50 ते 60 फूट तापी नदीच्या पुलावरून तिने खोल पाण्यात उडी मारली.

दरम्यान, तापी नदीमध्ये प्रचंड पाणी होते. युवती बुडत असल्याचे पाहून पुलावरील लोक आरडाओरड करू लागले. त्यानंतर नदीपात्रात मासेमारी करणाऱ्या तरुणांनी तिला वाचण्यासाठी जलद गतीने तीन युवकांनी मुलीच्या दिशेने बोट नेली. हवेच्या प्रचंड वेग असल्याने तिला वाचवण्यासाठी शर्थीचे प्रयत्न करावे लागले. त्यानंतर नदीत बुडत असलेल्या युवतीला बोटीवर घेतले. मच्छिमार करणाऱ्या तरुणांनी तीचे प्राण वाचवले. तिला बाहेर काढून तिला रुग्णवाहिकेतून निझर येथील सरकारी रुग्णालयात दाखल करण्यात आले. युवती सुखरूप असून तिची ओळख पटली आहे.

अक्कलकुवा तालुक्यातील गंगापूर गावातील वीस वर्षीय तरुणी पार्वती रवींद्र पाडवी असे युवतीचे नाव आहे. अक्कलकुवा येथे एस.वाय.बी.ए चे शिक्षण घेत होती. ता. 15 जून 2022 रोजी परीक्षा होती. परीक्षेचा अभ्यास न झाल्याने नापास होण्याच्या भीतीने तिने आत्महत्या करण्याचा प्रयत्न केला असे बोलले जात आहे. महाविद्यालयातील प्रशासनाने आत्महत्या करू नये व परीक्षेची भीती दूर करण्यासाठी समुपदेशन करणे गरजेचे आहे.