- सागर निकवाडे

Nandurbar News :

विविध मागण्यांच्या पू्र्ततेसाठी अंगणवाडी सेविका (Anganwadi Sevika) गेल्या 14 दिवसांपासून संपावर गेल्या आहेत. परिणामी नंदुरबार जिल्ह्यातील 2 हजार 585 अंगणवाड्या कुलुप बंद आहेत. या संपामुळे बालके पोषण आहारापासून वंचित राहू लागली आहेत. (Maharashtra News)

अंगणवाडी कर्मचाऱ्यांना सरकारी कर्मचाऱ्यांचा दर्जा द्यावा, सुधारित वेतनश्रेणी लागू करण्यात यावी आदी मागण्यांसाठी राज्यातील अंगणवाडी कर्मचारी बेमुदत संपावर गेले आहेत. शासनाने अद्याप अंगणवाडी सेविकांच्या मागण्यांबाबत काेणताच निर्णय जाहीर केलेला नाही.

त्यामुळे गेल्या 14 दिवसांपासून अंगणवाडीच्या इमारती कुलूप बंद आहेत. कुपोषणाचे प्रमाण कमी करण्यसाठी अंगणवाडी मधून विविध योजना राबविल्या जात असतात. याच ठिकाणी बालकांची आरोग्य तपासणी करण्यात येते.

('साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)

सध्या जिल्ह्यतील एकूण 2 हजार 585 अंगणवाड्या बंद आहेत. नंदुरबार जिल्ह्यातील जवळपास पाच हजार पेक्षा अधिक कर्मचारी संपावर गेले आहेत. कुपोषण रोखण्यासाठी महत्वपूर्ण योजना असलेल्या पोषण आहाराचे वाटप संपामुळे बंद असल्याने नंदुरबार जिल्ह्यात बालकांमध्ये कुपोषण वाढण्याची भीती पालकांकडून आणि सामाजिक कार्यकर्त्यांकडून व्यक्त केली जात आहे.

Edited By : Siddharth Latkar