Nanded Gram Panchayat Election Result

राज्यातील २ हजार ३५९ ग्रामपंचायत निवडणुकींच्या मतमोजणीला सुरुवात झाली असून निकालाचे प्राथामिक कल हाती येत आहे. निवडणुकीत विजयी उमेदवारांकडून जल्लोष केला जात आहे. अशातच नांदेडमधून एक धक्कादायक घटना समोर आली आहे. देगलुर तालुक्यातील तेलंगणा सीमेवर असलेल्या मानूर गावात मतमोजणी सुरू असताना दोन गटात तुफान राडा झाला. ('साम टीव्ही'चं व्हॉट्सअँप चॅनल जॉईन करण्यासाठी येथे क्लिक करा)

यावेळी दोन्ही गटातील लोकांनी एकमेकांवर दगडफेक केली. मानूर गावात गुत्ती तांडा इथे हा प्रकार घडला आहे. राडा सुरू होताच नागरिकांची पळापळ झाली. या दगडफेकीत काही लोक जखमी झाल्याची माहिती आहे. त्यामुळे परिसरात गोंधळाचं वातावरण आहे.

घटनेची माहिती मिळताच पोलिसांनी तातडीने धाव घेत परिस्थिती नियंत्रणात आणली आहे. दरम्यान, या घटनेचा व्हिडीओ सध्या सोशल मीडियावर तुफान व्हायरल होत आहे. मिळालेल्या माहितीनुसार, देगलूर तालुक्यातील मानूर गावातील गुत्ती तांडा गावात मतमोजणी सुरू होती.

यावेळी विजयी उमेदवारांनी जल्लोष केला. यातून दोन गटात वाद झाला. काही वेळातच हा वाद विकोपाला गेला. दोन्ही गटातील लोकांनी एकमेकांवर दगड-विटांचा मारा केला. या घटनेनंतर मतमोजणी केंद्रावर उपस्थित असलेल्या लोकांची मोठी पळापळ झाली.

या घटनेत काहीजण जखमी झाल्याची माहिती आहे. मरखेल पोलीस ठाण्याच्या हद्दीत घडलेल्या या घटनेनंतर गावात पोलीस बंदोबस्त वाढवण्यात आलाय. तसेच पोलिसांनी दोन्ही गटातील आरोपीं विरोधात गुन्हे दाखल करण्यात आले आहेत.