राज्यातील शेतकरी दुष्काळामुळे आर्थिक संकटात असताना दिलासा मिळण्याऐवजी शेतकऱ्यांचा छळ सुरू आहे. ऐन दुष्काळात राज्यातील फायनान्स कंपन्यांकडून शेतकऱ्यांचा जाच सुरू आहे. नांदेडमधील हिंगोली गेट परिसरातील खालसा फायनान्स कंपनीच्या कार्यालयात एका शेतकऱ्याचा मृतदेह आढळून आल्यानं एकच खळबळ उडाली. चंद्रकांत शिंदे या शेतकऱ्याचा मृतदेह गळफास अवस्थेत आढळलाय. कर्जवसुलीसाठी 2 दिवसांपूर्वी त्यांना गावातून नेण्यात आलं होतं. आपल्या मुलाचा घात केला हे सांगताना चंद्रकांत यांच्या आईला अश्रू अनावर झाले.

फायनान्स कंपन्यांच्या जाचासंदर्भात साम टिव्हीने बातमी लावून धरली. प्रशासनानं सबंधित खासगी फायनान्स कंपनीला सील ठोकलंय. कंपनीच्या मालकासह तीन जण गुन्हा दाखल झालाय.आर्थिक संकटात सापडलेल्या शेतकऱ्यांना फायनान्स कंपन्यांकडून कशी लूटमार सुरू आहे तेही पाहूयात...

दुष्काळातही फायनान्स कंपन्यांची लूटमार

खासगी फायनान्स कंपनीचं ग्रामीण भागात जाळं

एजंट मार्फत शेतकऱ्यांना कर्जाच्या जाळ्यात ओढण्याचा प्रयत्न

10 हजार रुपये देऊन हप्त्याला 1200 रुपये व्याज भरण्याचा नियम

व्याज न भरल्यास मुद्दल आणि चक्रवाढ व्याजाद्वारे पैशांची वसूली

पैसे न दिल्यास फायनान्स कार्यालयात आणून बेदम मारहाण

10 हजार रुपयांवर एक ते दोन महिन्यात लावतात 60 ते 70 हजार रुपये चक्रवाढ व्याज

दुष्काळामुळे बँका, पतसंस्था, खासगी आणि मायक्रो फायनान्स कंपन्यांनी शेतकऱ्यांकडे सक्तीने कर्जवसुली करु नये, असे सरकारचे आदेश आहेत. तरी खासगी फायनान्स कंपन्यांकडून शेतकऱ्यांचा जाच सुरू आहे. डांबून ठेवणे, मारहाण करणे आणि थेट बळीराजाचा बळी घेण्यापर्यंत या कंपन्यांची मजल गेल्यानं राज्यभरात संताप व्यक्त होतोय. आधीच अस्मानी संकटाने पिचलेला शेतकरी अशा प्रकाराने हतबल झाला आहे. जुलमी फायनान्स कंपन्यांवर कडक कारवाई करून या सावकारी जाचातून शेतकऱ्यांना दिलासा मिळणार का? हाच खरा सवाल आहे.