Nanded Accident News : नांदेड जिल्ह्यातील मुखेड - लातूर महामार्गावर कंटेनर आणि महामंडळच्या बसचा भीषण अपघात झाला आहे. हा अपघात काल (३ फेब्रुवारी) सायंकाळी सहाच्या सुमारास दबडे शिरुर पाटी जवळ झाला आहे. या अपघातात ९ प्रवासी जखमी झाले असून त्यात दोन अतीगंभीर जखमी झाले आहेत. जखमींना रुग्णालयात दाखल करण्यात आले असून त्यांच्यावर उपचार सुरु आहेत.

अपघात होताच कंटेनर चालक फरार झाला. हा अपघात (Accident) एवढा भीषण होता की बसची समोरची बाजू चक्काचूर झाली आहे. अपघातील जखमींना सुरवातीला मुखेडच्या उपजिल्हा रुग्णालयात दाखल करण्यात आले होते मात्र नंतर पुढील उपचारांसाठी नांदेडच्या शासकीय रुग्णालयात (Hospital) हलविण्यात आले आहे.

मुखेड आगाराची बस मुखेड कडे येत होती तर लातूरच्या दिशेने ट्रककंटेनर जात असताना मुखेड होऊन चार किलोमीटरच्या अंतरावरील लातूर राज्य महामार्गावरील शिरूर दबडे पाटीच्या वळणावर दोन वाहनांचा भीषण अपघात झाला. हा अपघात इतका भीषण होता की, एसटी बसच्या केबिनसह समोरील भागाचा अक्षरशः चुराडा झाला आहे. सुदैवाने या अपघातात कोणतीही जीवितहानी झाली नाही.