पराग ढोबळे, साम टीव्ही

गणपती विसर्जनाच्या बंदोबस्ताची रात्रभर ड्युटी करून घरी परतलेल्या नागपूर पोलिस दलातील एएसआयचा उपचारादरम्यान मृत्यू झाला. रवींद्र महादेवराव कोकांडे (वय 56) असे मृत पोलिस कर्मचाऱ्याचे नाव आहे. ते पोलिस मुख्यालयात कार्यरत होते. मिळालेल्या माहितीनुसार, रविवारी (27 सप्टेंबर) पहाटे साडेतीनच्या सुमारास कोकांडे यांच्या छातीत अचानक तीव्र वेदना सुरू झाल्या. गणपती विसर्जनाच्या बंदोबस्तासाठी ते पाचपावली पोलिस ठाण्याच्या हद्दीत तैनात होते. ड्युटी पूर्ण करून घरी परतल्यानंतर त्यांना त्रास जाणवला.

त्यानंतर त्यांचा मुलगा ऋषभ याने त्यांना तातडीने रुग्णालयात दाखल केले. प्राथमिक उपचारानंतर पुढील उपचारासाठी त्यांना धंतोलीतील रुग्णालयातून मेडिकल हॉस्पिटलकडे हलवण्यात आले. मात्र, उपचार सुरू असतानाच सकाळी ११ वाजून २७ मिनिटांनी डॉक्टरांनी त्यांना मृत घोषित केले. रवींद्र कोकांडे हे मनमिळाऊ स्वभावाचे असल्याने सहकाऱ्यांमध्ये लोकप्रिय होते. त्यांच्या निधनाने पोलिस दलात हळहळ व्यक्त होत आहे. त्यांच्या पश्चात पत्नी शीला आणि दोन मुले ऋषभ (२७) व रोहित (२५) असा परिवार आहे.

या प्रकरणी कपिलनगर पोलिसांनी आकस्मिक मृत्यूची नोंद केली आहे. त्यांच्यावर कपिलनगर घाट येथे शासकीय इतमामात अंत्यसंस्कार करण्यात आले. पोलिस दलाच्या वतीने बंदुकीच्या फैरी झाडून शोकसलामी देत एएसआय रवींद्र कोकांडे यांना अखेरचा निरोप देण्यात आला.