नागपूर: आपल्या मनाविरुद्ध लग्न झाल्यामुळे किंवा आपल्या आवडीच्या व्यक्तीशी लग्न लावून न दिल्यामुळे आत्महत्या करणाऱ्या प्रेमी युगुलांच्या संख्येत दिवसेंदिवस वाढ होत आहे. असचं एका प्रेमी युगुलाच्या प्रेम प्रकरणाला घरच्यांनी विरोध केल्यामुळे टोकाचं पाऊल उचलत आत्महत्या करण्याचा प्रयत्न केल्याची धक्कादायक घटना नागपूरमधील (Nagpur) रामटेक येथे घडली आहे.

मिळालेल्या माहितीनुसार, नागपूर जिल्ह्याच्या रामटेक (Ramtek) येथील एका प्रेमी युगुलांच्या प्रेमाला कुटुंबियांनी विरोध करत त्यांच्या लग्नाला नकार दिला होता. कुटुंबियांना या दोघांचं प्रेमप्रकरण मान्य नसल्यामुळे या प्रेमी युगुलाने विष (Poison) प्राषण करत आत्महत्येचा प्रयत्न केला आहे. अश्विनी उईके आणि अरुण कोडवते अशी या प्रेमी युगुलाचं नावं आहेत.

या दोघांनी विष प्राषण केल्यानंतर अश्विनीचा मृत्यू झाला आहे. तर प्रियकर अरुणची मृत्युशी झुंज सुरू आहे. दरम्यान, या घटनेबाबत पोलिसांना (Police) माहिती देण्यात आली असून पोलिस या घटनेचा तपास करत आहेत. मात्र, प्रेमाला विरोध केल्यामुळे आत्महत्या करणाऱ्या प्रेमी युगुलांच्या संख्येत वाढ होत असून विद्यार्थ्यांनी अशी टोकाची पाऊलं उचलू नये असं आवाहन पोलिस प्रशासनाकडून करण्यात येत आहे.

Edited By - Jagdish Patil