नागपूर : साम टीव्हीवरील चर्चसत्रात भाजपचे नेते आणि माजी खासदार सोमय्या यांनी वसुलीच्या पैशातील ४० टक्के शिवसेना, ४० टक्के राष्ट्रवादी काँग्रेस व २० टक्के वाट काँग्रेसला मिळतो, असा बिनबुडाचा खोटा आरोप करून काँग्रेस पक्षाची बदनामी केल्याचा आरोप काँग्रेसचे प्रवक्ते अतुल लोंढे यांनी केला होता. या विरोधात लोंढे यांनी सोमय्या यांच्या विरोधात नागपूर जिल्हा न्यायालयात 1 रुपया मानहाणीचा दावा दाखल केला. दोन कवडीचा दावा दाखल करता येत नाही म्हणून एक रुपयांचा दावा करणार असल्याचेही लोंढे यांनी सांगितले होते.

यावर जिल्हा न्यायालयाने आज याचिका दाखल करून घेत सोमय्या यांना नोटीस बजावत समन्स जारी केला आहे. यावर आज नागपूर येथील दिवाणी न्यायाधीशासमक्ष सुनावणी झाली. 20 नोव्हेंबर ला पुढील सुनावणी होणार असून सोमय्या यांना हजर राहण्याचे आदेश न्यायालयाने दिले आहेत.

भाजपचे नेते आणि माजी खासदार किरीट सोमय्या हे महाविकास आघाडीवर आणि नेत्यांवर सतत आरोप करत असतात. सोमय्या हे बिनबुडाचे आरोप करुन सत्तेतील काँग्रेस, राष्ट्रवादी आणि शिवसेना या पक्षांची नाहक बदनामी करत असतात असे म्हणत काँग्रेसचे प्रवक्ते अतुल लोंढे यांनी सोमय्यांविरोधात १ रुपयाचा मानहानीचा दावा दाखल करून दिवाणी आणि फौजदारी याचिका दाखल केली.

याचिकेनुसार, मागील काही महिन्यांपासून किरिट सोमय्या यांनी महाविकास आघाडी सरकारच्या मंत्र्यांविरोधात, नेत्यांविरोधात सातत्याने खोटेनाटे आरोप करून बदनामीची मोहीम उघडली आहे. भारतीय जनता पक्षाचे नेते व माजी खासदार किरिट सोमय्या हे वारंवार काँग्रेस, राष्ट्रवादी व शिवसेना नेत्यांच्याविरोधात गरळ ओकत असतात. बिनबुडाचे आरोप करून नाहक बदनामी करत असतात. सतत खोट्या आरोपांची राळ उडवून महाविकास आघाडीच्या नेत्यांना बदनाम करण्याचे काम सोमय्या हे करत आहेत.

स्वतःच तपास अधिकारी व स्वतःच न्यायाधीश असल्याच्या आविर्भाव ते विरोधी पक्षांच्या नेत्यांवर सातत्याने खोटे आरोप करून बदनामी करत आहेत. त्यामुळे, झालेल्या बदनामीची भरपाई म्हणून १ रुपया द्यावा, असेही याचिकेमध्ये म्हटले आहे. सर्व बाबी लक्षात घेता किरीट सोमय्या यांना न्यायालयाने २० नोव्हेंबर रोजी सकाळी ११ वाजता न्यायालयामध्ये स्वत: किंवा वकिलाला हजर करण्याचे आदेश दिले आहेत.

Edited By : Krushnarav Sathe