नागपुरातील रेवतीनगर परिसरात शिक्षक असलेल्या पती-पत्नीचा मृत्यू झाल्याची धक्कादायक घटना रविवारी सकाळी उघडकीस आली. मनिष प्रल्हाद गणवीर (वय ३८) आणि सोनाली मनिष गणवीर (वय ३५) अशी मृतांची नावे आहेत. या घटनेमुळे परिसरात हळहळ व्यक्त केली जात आहे.

मिळालेल्या माहितीनुसार, मनिष आणि सोनाली हे दोघेही गडचिरोली जिल्ह्यातील एटापल्ली तालुक्यातील हेडरी येथील लॉयड्स मेटल्स कंपनीद्वारे संचालित लॉयड्स राज विद्या निकेतन शाळेत शिक्षक म्हणून कार्यरत होते. २०२५-२६ या शैक्षणिक सत्रापासून त्यांनी या शाळेत प्रशिक्षित पदवीधर शिक्षक म्हणून काम सुरू केले होते. विशेष म्हणजे याचवर्षी शाळा व्यवस्थापनाने मनिष यांना पदव्युत्तर शिक्षक म्हणून पदोन्नती दिली होती.

सोनाली या गडचिरोलीजवळील नवेगाव (मुरखळा) येथील रहिवासी होत्या, तर मनिष हे नागपूरचे रहिवासी होते. दोघांचेही यापूर्वी विवाह झाले होते. मात्र, त्यांनी आपापल्या पूर्वीच्या जोडीदारांपासून घटस्फोट घेतला होता. त्यानंतर एकाच शाळेत नोकरी करत असताना दोघांनी विवाह करण्याचा निर्णय घेतला होता. त्यानुसार

३१ ऑगस्ट रोजी मनिष आणि सोनाली यांनी कोर्ट मॅरेज केलं होतं. त्यानंतर ते नागपुरातील रेवतीनगर येथील घरी राहत होते. मात्र, रविवारी सकाळी दोघांचाही मृत्यू झाल्याची घटना समोर आली. या घटनेमागील नेमके कारण अद्याप स्पष्ट झालेले नाही. पोलिसांकडून घटनेचा तपास सुरू असून, तपासातून अधिक माहिती समोर येण्याची शक्यता आहे.