पराग ढोबळे

नागपुर : नागपूरमध्ये रात्रीच्या सुमारास सोने- चांदीच्या दुकानावर सशस्त्र दरोडा टाकण्यात आला आहे. दुकान बंद करून जाणाऱ्या व्यापाऱ्याला बंदुकीचा धाक दाखवून त्यांच्या जवळ असलेले सोने- चांदीच्या दागिन्यांसह रोख रक्कम व कार घेऊन चोरटे पसार झाले आहेत. सदरची घटना नागपूरच्या पिपळा भागात घडली आहे. यामुळे परिसरात खळबळ उडाली आहे. 

नागपूर जिल्ह्याच्या पिपळा भागात रवी मुसळे यांचे निहारिका ज्वेलर्स नावाने दुकान आहे. सोने- चांदीचे दागिने विक्री करण्याचे काम मुसळे करत असतात. पिंपळा मार्गावरील निहारिका ज्वेलर्स दुकानाचे मालक मुसळे आणि त्यांचा पुतण्या हे रात्री काम आटोपल्यानंतर दुकान बंद करून घराकडे जाण्यासाठी निघाले होते. रवी हे दुकान बंद करून पुतण्यासोबत सोन्याचे दागिनेची पेटी कारमध्ये ठेवत असतानाच हि घटना घडली. 

सुरवातीला केला हवेत गोळीबार 

दुकान बंद करून गाडीत बसत असतांनाच चोरट्यांनी अचानक हवेत दोन गोळ्या फायरिंग केल्या. त्यानंतर त्यांनी मुसळे यांच्या पुतण्याच्या डोक्याला बंदूक लावून त्याला कारमधून खाली उतरवले. यानंतर सोन्याचे दागिने असलेली पेटी आणि कार घेऊन दरोडेखोर पसार झाले. अचानक घडलेल्या या प्रकारामुळे सराफ व्यावसायिक भयभीत झाले होते. 

१ किलो सोने, १५ किलो चांदी घेऊन फरार 

बंदुक लावत ज्वेलर्स दुकान मालकाला लुटण्याची घटना बुधवार रात्री घडलेली आहे. या दरोड्यामध्ये सुमारे एक किलो सोने आणि १५ किलो चांदी असा एक कोटी १५ लाखाचा मुद्देमाल घेऊन दरोडेखोर पसार झाले आहेत. या घटनेने एकच खळबळ आली असून अंधाराचा फायदा दरडेकरांनी हा डाव साधला असल्याचा बोलला जात आहे. दरम्यान रात्रीच या प्रकरणात पोलिसांनी तक्रार नोंदवून घेत तपास सुरू केला आहे.