नागपुरातील वाठोडा परिसरातून एक धक्कादायक बातमी समोर येत आहे. दहनघाटात अंत्यसंस्काराच्या विधीवेळी अचानक उडालेल्या भडक्यामुळे एका ज्येष्ठ नागरिकाचा मृत्यू झाला आहे. तर, चार नातेवाईक गंभीररित्या जखमी झाले आहेत. या प्रकरणी पोलिसांनी आकस्मिक मृत्यूची नोंद केली असून, पुढील तपास पोलिसांकडून सुरू आहे.

प्राथमिक माहितीनुसार, वाठोडा परिसरातील रहिवासी सुशीलाबाई हरिभाऊ मुनघाटे (वय वर्ष ८३) यांचे निधन झाले होते. गुरूवारी त्यांच्या पार्थिवावर अंत्यसंस्कार करण्यात आले. वाठोडा दहनघाटात अंत्यसंस्कार प्रक्रिया सुरू होती. या विधीसाठी कुटुंब उपस्थित होते. दरम्यान, दहन दिल्यानंतर विनोद पुंडलीकराव मुनघाटे (वय वर्ष ६४) हे चितेजवळ उभे होते. यावेळी चितेनं पेट घेण्यासाठी कुणीतरी त्यात डिझेल ओतले.

डिसेल ओतल्यानंतर भडका उडाला. विनोद यांच्यासह चार नातेवाईक गंभीररित्या आगीत भाजले. त्यांना तातडीने रूग्णालयात उपचारासाठी दाखल करण्यात आले. मात्र, विनोद यांची प्रकृती अधिक बिघडली. त्यांना दुसऱ्या रूग्णालयात रेफर करण्यात आले. मात्र, बुधवारी उपचार सुरू असताना त्यांचा मृत्यू झाला. उर्वरित जखमींवर उपचार सुरू आहेत.

या घटनेची माहिती मिळताच वाठोडा पोलीस घटनास्थळी दाखल झाले. पोलिसांनी या प्रकरणी आकस्मिक मृत्यूची नोंद केली आहे. सध्या चितेवर डिझेल कुणी आणि का ओतले? निष्काळजीपणामुळे गंभीर अपघात घडला आहे का? याचा तपास पोलिसांकडून सुरू आहे. दरम्यान, या घटनेनंतर परिसरात खळबळ उडाली आहे.