नागपूर : नागपूरमध्ये एक अतिशय हृदयद्रावक घटना समोर आली आहे. शहरातील वाठोडा पोलीस ठाण्याच्या हद्दीत भांडेवाडी परिसरात असलेल्या अंतुजी नगरमध्ये सोमवारी एक घटना घडली. छतावर खेळत असताना चार वर्षांची अनम शमशाद खान या चिमुरडीचा पाण्याच्या टाकीत पडून दुर्दैवी मृत्यू झाला. या दुर्दैवी घटनेमुळे संपूर्ण परिसरात शोककळा पसरली असून कुटुंबीयांवर दुःखाचा डोंगर कोसळला आहे.

मिळालेल्या माहितीनुसार, शमशाद खान हे आपल्या कुटुंबासह अंतुजी नगरमध्ये राहतात. ते खासगी वाहनचालक म्हणून काम करतात. त्यांच्या कुटुंबात पत्नी आणि दोन लहान मुली आहेत. सोमवारी दुपारी सुमारे तीनच्या सुमारास ही घटना घडली. मृत अनम ही घराच्या छतावर खेळत होती. छतावरच एक पाण्याची टाकी असून, त्यावर झाकण नसल्याने ती टाकी उघडीच होती.

खेळता-खेळता अनम टाकीजवळ गेली आणि कुतूहलापोटी ती टाकीत डोकावण्याचा प्रयत्न करत असताना तिचा तोल गेला आणि ती थेट पाण्यात बुडाली. ही घटना घडल्याची कोणालाच कल्पना नव्हती. सुमारे दोन तासांनी अनम कुठे दिसत नसल्याने तिच्या शोध घेण्यासाठी घरातील सदस्य आणि शेजाऱ्यांनी परिसर पिंजून काढला. अखेर छतावरील पाण्याच्या टाकीत पाहिल्यावर तिचा मृतदेह पाण्यात तरंगताना दिसून आला. तात्काळ तिला टाकीतून बाहेर काढून जवळच्या रुग्णालयात दाखल करण्यात आले. मात्र डॉक्टरांनी तपासून तिला मृत घोषित केले. या घटनेमुळे खान कुटुंबीयांवर दु:खाचा डोंगर कोसळला असून परिसरातील नागरिकही हादरून गेले आहेत.