Bhandara : मोहाडी नगरपंचायत उपाध्यक्षांवर हल्ल्याचा प्रयत्न नुकताच झाला. हा हल्ला करण्याचा प्रयत्न फसल्याने उपाध्यक्ष बजचावले. पोलिसांनी (police) संबंधितांकडून हत्यार जप्त केले आहे. या प्रकरणाची सखाेल चाैकशी सुरु आहे.

भंडारा जिल्ह्याच्या मोहाडी येथील नगरपंचायत उपाध्यक्ष शैलेश गभने यांच्यावर प्राणघातक हल्ला करण्याच्या उद्देशाने लपवून ठेवलेल्या तलवारीसह चार प्रकारचे हत्यार मोहाडी पोलिसांनी जप्त करून संशयित आरोपीला अटक (arrest) केली. दरम्यान संबंधित संशयितास जामीन मिळाल्याने पुन्हा माझ्या जिवाला धोका असल्याचा दावा नगरपंचायत उपाध्यक्ष शैलेश भने व त्यांच्या पत्नीनं पत्रकार परिषदेत घेऊन केला आहे. तसेच परिवारास पाेलिस सरंक्षणाची मागणी केली आहे.

या घटनेबाबतची अधिक माहिती अशी : आशिष चकोले हा इंदिरा वॉर्डात वडिलांसोबत मोहफुलाची अवैध दारू विक्रीचा व्यवसाय करतो अशी चर्चा आहे. त्याच्या घरासमोरून जाण्या-येण्याचा मार्ग अरुंद असल्याने व नेहमी दारुड्यांची गर्दी राहत असल्याने महिलांना तेथून जाण्या- येण्यासाठी मोठा त्रास सहन करावा लागत होता. जवळपास 40 ते 50 महिला, पुरुषांनी लेखी निवेदन देऊन दारू व्यवसाय बंद करण्याची मागणी केली होती. त्यामुळे शैलेश गभने यांनी मोहाडी पोलिसांना सूचना देऊन त्याचा व्यवसाय बंद पाडला होता.

याचा राग मनात धरून आशिषने उपाध्यक्षांवर प्राणघातक हल्ला करण्याची तयारी केली हाेती. मात्र हत्यारे घरासमोरील गिट्टीच्या ढिगाऱ्यात लपविताना उपाध्यक्षांच्या पत्नीला दिसल्याने त्यांनी तशी कल्पना पाेलिसांनी दिली. आशिषने लपवून ठेवलेले हत्यार पोलिसांनी जप्त केले. जर तो लपवत असलेले हत्यार लक्षात आले नसते तर रात्रीला मारण्याची शक्यता होती, अशी भीतीही गमने यांनी बोलून दाखविली आहे.

परंतु आशिष याला मोहरा बनविण्यात आला असून, त्याच्या पाठीमागे कर्ता दुसराच व्यक्ती आहे. त्या व्यक्तीच्या विरोधात न्यायालयात साक्ष दिली होती, असेही गभने यांनी पत्रकार परिषदेत सांगितलं.

Edited By : Siddharth Latkar