आजपासून देशात मोदी ३.० च्या पर्वाची सुरुवात झालीय. नरेंद्र मोदींनी तिसऱ्यांदा पंतप्रधानपदाची शपथ घेतली असून महाराष्ट्रातील ६ नेत्यांना आज राष्ट्पतींमार्फत शपथ देण्यात आलीय. केंद्रीय मंत्रिमंडळातील महाराष्ट्रानं षटकार मारलाय. शपथविधीसाठी राज्यातून ६ खासदारांची वर्णी लागलीय.

भाजपमधून नितीन गडकरी, पीयूष गोयल, रक्षा खडसे, मुरलीधर मोहोळ यांना मंत्रिपद मिळालंय. तर रामदास आठवले यांनाही केंद्रीय मंत्रिमंडळात त्यांचं स्थान कायम राखलंय. तर शिंदे गटाकडून बुलढाण्याचे खासदार प्रतापराव जाधवांची मंत्रिपदी वर्णी लागलीय.

शपथ घेणारे महाराष्ट्रातील नेते

नितीन गडकरी (कॅबिनेट मंत्री)

पीयूष गोयल (कॅबिनेट मंत्री)

प्रतापराव जाधव (राज्यमंत्री स्वतंत्र प्रभार)

रामदास अठावले (राज्यसभा, राज्य मंत्री)

रक्षा खड़से (राज्य मंत्री)

मुरलीधर मोहोळ (राज्य मंत्री)

दरम्यान, नरेंद्र मोदींनी सलग तिसऱ्यांदा पंतप्रधानपदाची शपथ घेतल्यानंतर जळगाव, सिंदखेडराजा, धुळे आणि गोंदियात जल्लोष साजरा करण्यात आलाय. सिंदखेडराजा येथे फटाके फोडून पेढे वाटून आनंद उत्सव साजरा करण्यात आलाय. तर धुळ्यात फटाक्यांची आतिषबाजी करत कार्यकर्त्यांनी ढोल ताशांच्या गजरावर ठेका धरत जल्लोष केलाय. गोंदिया शहरातील जयस्तंभ चौकात देखील भाजपचाकडून जल्लोष करण्यात आलाय.