अमरावती : अमरावती शहरातील रेन्बो हॉस्पिटलमध्ये कंत्राटी महिला सुरक्षा कर्मचाऱ्यांना त्रास देणाऱ्या कंत्राटदाराला महाराष्ट्र नवनिर्माण सेनेच्या महिला पदाधिकाऱयांनी भर रस्त्यात चोप दिला व पोलिसांच्या स्वाधीन केले आहे. मागील कित्येक दिवसापासून सदर कंत्राटदार हा रुग्णालयाच्या महिला सुरक्षा रक्षकांना असभ्य वागणूक देत असल्याच्या तक्रारी मनसे पदाधिकाऱ्यांना प्राप्त झाल्या होत्या.

हे देखील पहा -

पगारासाठी महिलांना विविध प्रकारे त्रास देऊन त्यांच्याशी लगट करण्याचा प्रयत्न हा कंत्राटदार आणि त्याचे सहकारी करत होते. ड्रेसचे मोजमाप घेण्याच्या नावाखाली महिलांना स्पर्श करणे आणि विरोध करणाऱ्या महिलांना तक्रार केली म्हणून कामावरून काढून टाकणे, आणि त्यांचा पगार आणि पीएफ सुद्धा कापण्याची हुकूमशाही करण्यापर्यंत या विकृत प्रवृत्तीच्या लोकांची मजल गेली होती.

कामावरून काढलेल्या महिलांनी मनसेचे शहराध्यक्ष गौरव बांते यांच्याकडे तक्रार करताच महाराष्ट्र नवनिर्माण सेनेच्या पदाधिकाऱ्यांनी सदर कंत्राटदारास भर रस्त्यात चोप दिला आणि राजापेठ पोलिसांच्या सुपूर्द केले. मुख्य रस्त्यावर सुरु असलेल्या या संपूर्ण प्रकारामुळे बघ्यांची चांगलीच गर्दी झाली होती.

Edited By : Krushnarav Sathe