Maratha Aarakshan:

मराठा आरक्षणामुळे काही दिवसांपूर्वी जालना आणि बीडमधील वातावरण चांगलंच तापलं होतं. मराठा आंदोलकांनी आक्रमक भूमिका घेत माजलगावचे आमदार प्रकाश सोळंके यांचं घरही जाळलं होतं. सोळंके यांची एक ऑडिओ क्लीप व्हायरल झाल्यानंतर आंदोलकांनी आक्रमक भूमिका घेतली होती. त्यावर आता सोळंकेच्या संभाषणाची क्लिप व्हायरल करणाऱ्या आरोपीला पोलीस कोठडी सुनावण्यात आलीये.

मिळालेल्या अधिक माहितीनुसार, सुंदर भोसले असं ऑडिओ क्लिप व्हायरल करणाऱ्या आरोपीचं नाव आहे. प्रकाश सोळंके यांच्याशी फोनवर बोलताना त्यांच्या संभाषणाची क्लिप व्हायरल करणाऱ्या सुंदर भोसलेला पोलिसांनी ताब्यात घेतलंय. तसेच न्यायालयासमोर त्याला हजर केले असता भोसलेला ६ नोव्हेंबरपर्यंत पोलिस कोठडी सुनावली आहे.

आमदार प्रकाश सोळंके यांच्या घरावर दगडफेक करत त्यांच्या बंगल्याच्या आवारात असलेल्या गाड्या ३० ऑक्टोबर रोजी मराठा आंदोलकांनी जाळल्या होत्या. आमदार प्रकाश सोळंकेंच्या व्हायरल ऑडिओ क्लिपवरून मराठा आंदोलक आक्रमक झाले होते. आमदार सोळंकेंच्या घरावर दगडफेक प्रकरणी पोलिस मागील तिन दिवसांपासून अॅक्शन मोडमध्ये असून आतापर्यंत २८ जणांविरूध्द गुन्हे दाखल केले आहेत.

राष्ट्रवादी काँग्रेस पक्ष अजित पवार गटाचे आमदार प्रकाश सोळंके यांनी काल छत्रपती संभाजीनगरला जाऊन मनोज जरंगे पाटील यांची भेट घेतली. आमदार प्रकाश सोळंके यांची ऑडिओ क्लिप समाज माध्यमांवर व्हायरल झाली होती त्यांनतर प्रकाश सोळंके यांच्या घरावर हल्ला करण्यात आला होता. समाजामध्ये माझ्या या ऑडिओ क्लिप संदर्भात गैरसमज पसरवण्यात येत असल्यामुळे आपली बाजू मनोज जरंगे पाटील यांच्याकडे मांडण्यासाठी सोळंकेंनी त्यांची भेट घेतली होती.