Gopichand Padalkar vs jitendra awhad Vidhan Bhavan Rada News : विधानभवनाच्या आवारात गोपीचंद पडळकर आणि जितेंद्र आव्हाड यांच्या समर्थकांमध्ये गुरुवारी विधानभवनाच्या आवाराज जोरदार हाणमारी झाली. एकमेकांना लाथाबुक्क्यांनी मारलं, याचे व्हिडिओ समोर आले अन् महाराष्ट्राची मान शरमेनं झुकली. पोलिसांनी पडळकर आणि आव्हाड यांच्या कार्यकर्त्यांवर गुन्हे दाखल करत अटक केली. आव्हाड यांनी पडळकर यांच्यावर गंभीर आरोप केले, यावर आमदार पडळकर यांनी प्रतिक्रिया दिली. आम्ही कोर्टात लढायला तयार आहोत, आम्ही कायद्याला माणणारे कार्यकर्ते असल्याचं ते म्हणाले. आमच्या सहकाऱ्याकडून चूक झाल्याचेही पडळकर म्हणाले.

आमच्या सहकाऱ्याकडून चूक झाली. आमच्याही कार्यकर्त्यावर गुन्हा दाखल झालाय, त्यांनाही अटक करण्यात आली आहे. आम्ही कायद्याला माणणारे आहोत. कारवाईला सामोरं जायला तयार आहोत, कोर्टात आम्ही आमची बाजू मांडू असे पडळकर म्हणाले. त्याशिवाय आव्हाडांनी पोलिसांच्या गाडीची मोडतोड केली, हे बरोबर आहे का? असा सवाल त्यांनी उपस्थित केला.

या घटनेवर काल मी माझी भूमिका व्यक्त केलेली आहे. विधानसभा अध्यक्षांकडे जाऊन दिलगिरी व्यक्त केली. आमच्या कार्यकर्त्यांकडून चूक झाली, त्यांना ताकिद दिली आहे. तुम्ही जी काही कारवाई करायची ती करू शकता, असं अध्यक्षांसोबत बोलणं झालं होतं. अध्यक्षांच्या अधिकारातील हा विषय आहे. त्यामुळे ते कारवाई करतील ती मान्य असेल. रात्री उशिरा कार्यकर्त्यांवर गुन्हा दाखल झाला आहे. कायदा सर्वश्रेष्ठ आहे. विधानसभा अध्यक्षांनी जी भूमिका घेतली, त्यावर कोणतेही मत नाही, कायद्याला माणणारे कार्यकर्ते आहोत. जी कारवाई झाली, त्याला कोर्टात सामोरं जायला तयार आहे, असे पडळकर म्हणाले. पोलिसांच्या गाडीसमोर झोपणे किंवा अडवणे, मोडतोड करणं ही गुंडगिरी नाही का? असा सवाल गोपीचंद पडळकर यांनी उपस्थित केला.