महेंद्र वानखेडे 

मीरा भाईंदर : मीरा भाईंदरच्या काश्मीर परिसरात दरोडा टाकण्याची घटना घडली होती. यात सुमारे १० लाख रुपयांची रोकड लांबविण्यात आले होते. नकली बंदुकीचा धाक दाखवून भाच्याने प्रेयसीच्या मदतीने मामाच्या घरी दरोडा टाकल्याचे उघडकीस आले आहे. या प्रकरणी तिघांना ताब्यात घेण्यात आले आहे. 

मीरा भाईंदरच्या (Mira Bhayander) काशीमीरा परिसरातील जनता नगरमध्ये हि धक्कादायक घटना घडली होती. यात ३० सप्टेंबरला पहाटेच्या सुमारास दोन पुरुष आणि एक महिला बुरखा घालून घरात घुसले होते. त्यांनी नकली बंदुकीचा धाक दाखवून १० लाख रुपये लंपास केले. घडल्या प्रकाराबाबत पोलिसात तक्रार दाखल करण्यात आली होती. तक्रारी नंतर पोलिसांनी सिसिटीव्ही कॅमेरे तपासले असता एका वाहनातून हे तिघे पसार झाल्याचे निष्पन्न झाले होते. त्याआधारे पोलिसांनी (Police) शोध घेत एका महिलेसह दोघांना अटक केली आहे. 

भाच्याने रचला कट 

लोन ऍपमधून आठ लाखांचे कर्ज झाले होते. यामुळे कर्ज फेडण्यासाठी पैशांची गरज असल्याने दूध विक्रेता मामाकडे रोख रक्कम असल्याची माहिती होती. त्यानुसार प्रेयसी आणि काकाच्या मदतीने मामाच्या घरात चोरी करण्याचा प्लॅन भाच्याने आखला होता. त्यानुसार चोरी करण्यात आली. काशीगाव पोलिसांनी तिघांना अटक केली असून १० लाख रुपये जप्त करण्यात आले असल्याची माहिती पोलीस उपायुक्त प्रकाश गायकवाड यांनी दिली.