महेंद्र वानखेडे, साम टीव्ही, प्रतिनिधी

मिरा भाईंदरमध्ये अत्यंत संतापजनक घटना घडली आहे. येथे एक महिला घरात एकटी असल्याचं पाहून एका नराधमाने अत्याचार केल्याची घटना घडली आहे. यामुळे परिसरात एकच खळबळ माजली आहे. स्थानिकांच्या मदतीने या आरोपीला पोलिसांनी बेड्या ठोकल्या आहेत.

मिळालेल्या माहितीनुसार, शनिवारी दिनांक १४ सप्टेंबर रोजी भाईंदरमध्ये रात्री ११ वाजेच्या सुमारास महिलेला एकटी घरात पाहून आरोपी गौतम घरात घुसला. यानंतर त्याने महिलेचे हातपाय आणि तोंड ओढणीने बांधले आणि अत्याचार केला. त्यानंतर आरोपीने घरातच दरवाजा बंद करून महिलेसमोर मध्यपान केले. नंतर पुन्हा महिलेवर अत्याचार केला.

आरोपीने हातपाय, तोंड बांधल्याने महिलेला बाहेर येण्यास अडचण होत होती. महिलेने शौचालयात जाण्याचा बहाना करत कशीबशी स्वतःची सुटका करून घेतली. यानंतर महिलेने शेजारी राहणाऱ्या घरमालकाला माहिती देण्याचा प्रयत्न केला. मात्र शेजारी राहणारे घरमालक देखील घरात नव्हते.

त्यानंतर महिलेने परिसरात आरडाओरड केली, हे पाहताच आरोपीने तिथून पळ काढला. या घटनेच्या वेळी महिलेची लहान मुलगी वय वर्षे तीन ही चिमुकली घरात झोपलेली होती. सुदैवाने या घटनेत ती बचावली आहे.

दरम्यान, मिरा-भाईंदर, वसई, विरार पोलीस आयुक्तालयामध्ये दिवसेंदिवस वाढत्या महिला अत्याचाराच्या घटनेमुळे महिला सुरक्षेचा प्रश्न ऐरणीवर आला आहे. पीडित महिलेने दिलेल्या माहितीनुसार, स्थानिकांनी या आरोपीचा शोध घेण्यास सुरुवात केली. दिनांक १५ रविवार दिवशी आरोपी गौतम पुन्हा याच परिसरात फिरत असल्याचा स्थानिकांच्या निदर्शनास आले.

पीडित महिलेने ओळख पटवून दिल्यानंतर स्थानिकांनी आरोपीला ताब्यात घेऊन पोलिसांच्या स्वाधीन केलं. भाईंदर पोलिसांनी पीडित महिलेच्या तक्रारीवरून बलात्कार व इतर कलमानुसार गुन्हा दाखल केला आहे. संबंधित आरोपी विरोधात चोरी, विनयभंग सारख्या चार पेक्षा अधिक गुन्ह्यांची नोंद असल्याची माहिती भाईंदर पोलीस ठाण्याचे वरिष्ठ पोलीस निरीक्षक विवेक सोनवणे यांनी दिली. याप्रकरणी पोलीस पुढील कारवाई करत आहेत.