Maratha Reservation:

राज्यात मराठा आरक्षणाचा मुद्दा सध्या चांगलाच चर्चेत आहे. एकीकडे आरक्षणाच्या मागणीसाठी सकल मराठा समाज एकवटला असताना सरकारने EWS आरक्षणाची जाहिरात वृत्तपत्रांमध्ये दिली आहे. मराठा समाजाच्या विकासासाठी शासन कटीबद्ध.. असा उल्लेख या जाहिरातीमध्ये करण्यात आला असून या जाहिरातीमुळे नव्या वादाला तोंड फुटण्याची शक्यता निर्माण झाली आहे.

आरक्षणाच्या मागणीसाठी (Maratha Reservation) राज्यात मराठा समाज आक्रमक झाला आहे. आरक्षणासाठी लढा उभारलेले मनोज जरांगे पाटील यांनी सरकारला दिलेला अल्टिमेटमही संपत आल्याने ते काय भूमिका घेणार याकडे सर्वांचे लक्ष लागले आहे.

एकीकडे मराठा बांधव सरसकट मराठा आरक्षणाची मागणी करत असतानाच सरकारकडूनEWS आरक्षणाची जाहिरात प्रसिद्ध करण्यात आली आहे. या जाहिरातीमधून मराठा समाजासाठी असलेल्या योजनांची माहिती देण्यात आली आहे. शुद्ध मनानं आम्ही दिलेल्या संधीचं सोने करा, असे या जाहिरातीमध्ये म्हणले आहे. यावरुन आता नवा वाद उभा राहण्याची शक्यता निर्माण झाली आहे.

जरांगे पाटलांची टीका..

दरम्यान, या जाहिरातीवरुन मनोज जरांगे पाटील (Manoj Jarange Patil) यांनी सरकारवर टीका केली आहे. "सरकारने EWSच्या जाहिरातीमधून नवीन पिल्लू बाहेर काढले आहे. मात्र आम्हाला तात्पुरती मलमपट्टी नको, कायमचा इलाज पाहिजे. आम्ही मागितलेले सरसकट आरक्षण द्या.." अशा शब्दात जरांगे पाटील यांनी या जाहिरातीवर टीका केली आहे.

तसेच मनोज जरांगे पाटील यांनी "तुमच्या हातात दोन दिवस आहेत. आरक्षणाचा निर्णय जाहीर करा. मराठ्यांच्या नादी लागू नका, त्यांच्याशी खेळू नका, असे म्हणत आम्ही शिवाजी महाराजांचे मावळे आहोत. आम्ही गाफील नाही, 25 तारखेनंतर पेलणार नाही अशा आंदोलनाची घोषणा करणार आहोत," असा इशाराही सरकारला दिला आहे. (Latest Marathi News)