ही काळ्या काचा लावलेली अलिशान लम्बोर्गीनी कार मंत्रालयात दुपारी 3 वाजता धडकली आणि मंत्रालयात आलेल्या सर्वांचंच लक्ष तिनं वेधून घेतलं.कारण सर्वसामान्य जनतेला मंत्रालयात प्रवेश करण्यासाठी तासंतास प्रतीक्षा करावी लागते. मात्र या अलिशान लम्बोर्गीनीला गेटवर ना कुणी अडवलं ना चेंकिंगसाठी कुणी थांबवलं.त्यामुळे सर्वांच्याच नजरा या लम्बोर्गीनीकडे वळल्या..

पार्किंगमध्ये थाटात उभी राहिल्यानंतर या लम्बोर्गीनीतून उतरलेल्या हस्तीचे पाय वळले ते थेट जलसंपदा मंत्री राधाकृष्ण विखे पाटील यांच्या दालनाकडे.विखे पाटलांकडे ही हस्ती पाच-दहा मिनिटं वगैरे नव्हे तर तब्बल दोन तास ठाण मांडून बसली होती. त्यामुळे ही अलिशान लम्बोर्गीनी मंत्रालयाच्या पार्किंगमध्ये दोन तास उभी होती.जो येत होता तो या लम्बोर्गीनीकडे पाहिल्याशिवाय पुढे जात नव्हता. कारण पांढऱ्या रंगाची इमारत असलेल्या मंत्रालयात सगळीकडे पांढऱ्या गाड्यांचाच ताफा नेहमीचाच.

.मात्र पांढऱ्या गाड्यांमध्ये ही अलिशान काळी लंबोर्गीनी वेगळी ठरल्यामुळे सर्वांचंच लक्ष ती वेधून घेत होती. आणि त्यामुळेच काळ्या काचा असलेली ही काळी लम्बोर्गीनी मंत्रालयातून संध्याकाळी ५ वाजता गेल्यानंतरही तर्क वितर्क लढवून चर्चेचं गुऱ्हाळ सुरू होतं. मात्र त्यानंतर ही अलिशान कार स्काय लाईन कमर्शियल ट्रस्टची असल्याची माहिती समोर आलीय.