महाराष्ट्राच्या राजकारणात 500 कोटी रुपयांच्या कथित व्यवहारावरून नवा वाद निर्माण झाला आहे. दसरा मेळाव्यात खासदार श्रीकांत शिंदेंच्या माध्यमातून एकनाथ शिंदेंनी मनोज जरांगेंना 500 कोटी दिले, अशी भाजपमध्ये कुजबूज सुरु आहे असा गंभीर आरोप मनोज जरांगेंनी केला. या आरोपानंतर राज्याच्या राजकीय वर्तुळात चर्चांना उधाण आले आहे.

मनोज जरांगे यांच्या आरोपांवर प्रतिक्रिया देताना एकनाथ शिंदे यांनी हे आरोप स्पष्टपणे फेटाळून लावले. आपण कोणालाही 500 कोटी रुपये दिले नाहीत आणि कोणाकडून घेतलेही नाहीत, असे त्यांनी सांगितले. तसेच, जरांगे यांनी आपल्या आरोपांचे पुरावे सादर करावेत, असे आव्हानही शिंदे यांनी दिले होते. यानंतर मनोज जरांगे यांनी या प्रकरणाशी संबंधित पुरावा देणार असल्याचे सांगितले होते. आपल्याकडे एक ऑडिओ क्लिप असल्याचा दावा त्यांनी केला होता. आता ही कथित ऑडिओ क्लिप त्यांनी प्रसारमाध्यमांसमोर आणली आहे. ही क्लिप महाराष्ट्र विधानसभा निवडणुकीपूर्वी भाजपच्या एका ऑनलाइन मिटिंगमध्ये झालेल्या चर्चेची असल्याचे सांगितले जात आहे.

या रेकॉर्डिंगमध्ये दोन महिलांमध्ये हिंदी भाषेत संवाद झाल्याचे ऐकू येते. त्यापैकी एक महिला बोलताना जरांगे पाटील यांना आधीच 500 कोटी रुपये मिळाल्याचा दावा करते. हे पैसे श्रीकांत शिंदे यांच्या माध्यमातून दिल्याचेही ती महिला संभाषणात सांगत असल्याचा दावा करण्यात आला आहे. तसेच, विधानसभा निवडणुकीत जरांगे यांची भूमिका भाजपसाठी किती फायदेशीर ठरेल, याबाबत आपले मत वेगळे असल्याचे ती म्हणते.

दरम्यान, या ऑडिओ क्लिपमधील आवाज कोणाचा आहे, संभाषण नेमके कधी झाले आणि त्यातील दाव्यांमध्ये कितपत तथ्य आहे, याची पुष्टी साम टीव्ही करत नाही. दरम्यान मनोज जरांगे यांनी माझ्या विरोधात षडयंत्र रचल्याचा आरोप केला आहे. आता एकनाथ शिंदे काय प्रतिक्रिया देतायत याकडे संपूर्ण राज्याचे लक्ष लागले आहे.