नाशिकमध्ये शिवसेना शिंदे गटाने मोठी खेळी केली आहे. ठाकरेंच्या शिलेदाराला फोडण्यात शिंदे गटाला यश आले आहे. काही दिवसांपूर्वी ठाकरे गटाचे नेते सुधाकर बडगुजर यांनी शिंदे गटामध्ये प्रवेश केला. त्यानंतर आता ठाकरे गटाला दुसरा मोठा धक्का बसला आहे. शिवसेना उद्धव ठाकरे गटाचे महानगरप्रमुख विलास शिंदे यांच्यासह ८ माजी नगरसेवकांनी उद्धव ठाकरेंची साथ सोडली आहे. हे सर्वजण लवकरच शिवसेना शिंदे गटात प्रवेश करणार आहे. येत्या रविवारी ते धनुष्यबाण हाती घेणार आहेत.

ठाकरे गटाचे नाशिक महानगर प्रमुख विलास शिंदे हे रविवारी शिंदे गटामध्ये प्रवेश करणार आहेत. त्यांच्यासोबत ८ माजी नगरसेवक, शेकडो कार्यकर्ते आणि समर्थक देखील शिंदे गटात प्रवेश करणार आहेत. उत्तर महाराष्ट्रातील २ माजी आमदार देखील शिवसेना शिंदे गटात प्रवेश करणार असल्याची माहिती समोर आली आहे. विलास शिंदे यांनी गेल्या काही दिवसांत उपमुख्यमंत्री एकनाथ शिंदे यांची दोन वेळा भेट घेतली होती. त्यानंतर त्यांनी ठाकरे गटाला रामराम ठोकला. आता ते शिंदे गटात येणार आहेत.

आगामी महापालिका निवडणुकीच्या पूर्वी हा उद्धव ठाकरे गटाला मोठा धक्का मानला जात आहे. विलास शिंदे यांच्यासह माजी नगरसेवक शिंदे गटात येणार असल्यामुळे नाशिकमध्ये शिंदे गटाची ताकद आणखी वाढणार आहे. सुधाकर बडगुजर यांच्यानंतर उद्धव ठाकरे गटाला लागलेली गळती सुरूच आहे. ठाकरे गटाला एकापाठोपाठ एक धक्के बसत असून आऊटगोईंग सुरू आहे. ठाकरे गटाचे नेते शिंदे गटामध्ये जात असल्यामुळे शिंदे गटाची ताकद वाढत चालली आहे.