आगामी स्थानिक स्वराज्य संस्थांच्या निवडणुकीच्या पार्श्वभूमीवर सर्वच पक्षांनी जोर लावला आहे. महायुती तसेच महाआघाडीतील सर्व घटक पक्षांनी कंबर कसली आहे. नुकतेच नगरपंचायत तसेच नगरपरीषदेच्या निवडणुका जाहीर कऱण्यात आले. या निवडणुका डिसेंबर महिन्याच्या सुरूवातीला पार पडतील. दरम्यान, ऐन निवडणुकीच्या काळात वाशिम जिल्ह्यात राजकीय घडामोडींना वेग आला आहे. अशातच शिवसेना शिंदे गटाला खिंडार पडलं आहे. शिवसेना शिंदे सेनेतील पदाधिकाऱ्यांनी शिवसेना ठाकरे गटात प्रवेश केला आहे.

वाशिम जिल्ह्यात आगामी स्थानिक स्वराज्य संस्थांच्या निवडणुकांच्या पार्श्वभूमीवर शिवसेना शिंदे गटाला धक्का बसला आहे. वाशिम जिल्ह्यातील कारंजा येथील युवा सेनेच्या वीस पदाधिकारी आणि कार्यकर्त्यांनी शिवसेना शिंदे सेनेला जय महाराष्ट्र केला आहे. त्यांनी शिवसेना ठाकरे गटाची साथ देण्याचा निर्णय घेतला आहे.

युवा सेनेच्या २० पदाधिकारी आणि कार्यकर्त्यांनी शिवसेना ठाकरे गटात प्रवेश केला आहे. ऐन निवडणुकीच्या काळात वाशिम जिल्ह्यातील कारंजामध्ये शिवसेना शिंदे सेनेला धक्का बसला आहे. हा पक्षप्रवेश सोहळा ठाकरे सेनेचे खासदार संजय देशमुख यांच्या उपस्थितीत पार पडला आहे. शिंदे सेनेतील पदाधिकारी आणि कार्यकर्त्यांनी ठाकरे गटाची साथ दिल्यामुळे राजकीय वर्तुळात चर्चेला उधाण आलं आहे. कारंजा येथे ठाकरे गटाची ताकद वाढली आहे.

निवडणुकीच्या तयारीचा अंतिम टप्पा जवळ

वाशिम जिल्ह्यात नगरपरिषद निवडणुकीच्या तयारीचा अंतिम टप्पा सुरू असून, वाशिममध्ये उमेदवारांच्या हालचालींना मोठी गती मिळाली आहे. नाहरकत प्रमाणपत्र मिळवण्यासाठी सुरू झालेल्या स्पर्धेमुळे शहरातील करवसुलीत लक्षणीय वाढ झाली आहे. नगरपरिषद प्रशासनाने दिलेल्या माहितीनुसार, नाहरकत प्रमाणपत्रासाठी नागरिक आणि उमेदवारांकडून करण्यात आलेल्या वाढत्या अर्जांमुळे करवसुलीने विक्रमी ८० लाखांचा टप्पा ओलांडला आहे. यामुळे निवडणूक प्रक्रियेपूर्वी नगरपरिषदेला अपेक्षापेक्षा अधिक महसूल मिळाला आहे.