गणेश कवडे, साम टीव्ही

मुंबई : महायुतीचं खातेवाटप अखेर ठरलं आहे. महायुतीच्या खातेवाटपावर येत्या २४ तासांत अंतिम शिक्कामोर्तब होणार आहे. येत्या दोन दिवसांत मुख्यमंत्री देवेंद्र फडणवीस संपूर्ण खातेवाटपाची यादी राज्यपाल सी पी राधाकृष्णन यांना देणार आहे. त्यामुळे राज्याचे नवे मंत्री लवकरच कामकाजाला लागणार आहेत.

महायुतीच्या ३९ मंत्र्यांनी रविवारी नागपुरातील राजभवनात मंत्रिपदाची शपथ घेतली. मंत्रिमंडळ विस्तारात भाजप २०, शिवसेनेकडे १२ आणि राष्ट्रवादी काँग्रेसकडे १० मंत्रिपदे असणार आहेत. महायुतीच्या सरकारमध्ये २० नव्या चेहऱ्यांना संधी देण्यात आली आहे. तसेच काही तरुण चेहऱ्यांनाही मंत्रिपदाची संधी देण्यात आली आहे. दुसरीकडे या मंत्रिमंडळाच्या विस्तारावरून नाराजीनाट्य देखील सुरु झाले आहे. दरम्यान, शपथविधीनंतर आता खातेवाटप कधी होणार, याची चर्चा सुरु असताना त्याबाबत मोठी माहिती हाती आली आहे.

सूत्रांनी दिलेल्या माहितीनुसार, महायुतीचे खातेवाटप ठरल्याची माहिती येत आहे. येत्या २४ तासांत महायुतीच्या खातेवाटपावर अंतिम शिक्कामोर्तब होणार आहे. शिवसेना आज रात्रीच यादी मुख्यंत्री देवेंद्र फडणवीस यांना देणार आहे. तर राष्ट्रवादी काँग्रेसकडून त्यांची यादी उद्या दिली जाणार आहे. यानंतर मुख्यमंत्री देवेंद्र फडणवीस येत्या दोन दिवसांत राज्यपाल सी पी राधाकृष्णन यांना संपूर्ण खातेवाटपाची यादी देणार आहे.

कसे असेल महायुतीचं खातेवाटपं?

गेल्या मंत्रिमंडळातील महत्वाची खाती त्या त्या पक्षाकडेच राहणार आहे. भाजपकडे गृह खाते राहणार आहे. तर शिवसेनेकडे नगरविकास खाते राहणार आहे. दुसरीकडे अजित पवार गटाचे अर्थ खाते कायम राहणार आहे. भाजपकडे महसूल, सार्वजनिक बांधकाम, पर्यटन, उर्जा खाते राहणार आहे. शिवसेनेचे उत्पादन शुल्क खाते हे राष्ट्रवादी काँग्रेसला दिलं जाणार आहे. भाजपच्या वाटेचे गृहनिर्माण शिवसेनेच्या ताब्यात जाणार असल्याची माहिती खात्रीलायक सूत्रांनी दिली आहे.