नोव्हेंबर महिना अर्धा संपला आला असला तरी राज्यातील उन्हाचा जोर अजूनही कायम आहे. दुपारच्या वेळी कडक ऊन जाणवत आहे. तर दुसरीकडे, पहाटेच्या वेळी तापमानात घट होत असल्याने गारठा वाढला आहे. त्यामुळे सध्या राज्यात सकाळी थंडी आणि दुपारी कडक ऊन असे वेगवेगळे वातावरण पाहायला मिळत आहे.

गेल्या काही दिवसांपासून राज्यातील कमाल आणि किमान तापमानात मोठी तफावत दिसून येत आहे. कमाल तापमान म्हणजे दिवसा नोंदवले जाणारे सर्वाधिक तापमान, तर किमान तापमान म्हणजे रात्री किंवा पहाटे नोंदवले जाणारे सर्वात कमी तापमान होय. या दोन्ही तापमानांमध्ये सध्या १४ ते २१ अंशांपर्यंत फरक आहे.

विशेष म्हणजे धुळे, जळगाव आणि निफाड येथे दिवसा आणि पहाटेच्या तापमानात तब्बल २१ अंशांचा फरक नोंदवण्यात आला आहे. त्यामुळे या भागांमध्ये सकाळी थंड वातावरण, तर दुपारी उन्हाचा चांगलाच चटका जाणवत आहे. नोव्हेंबर महिन्यात साधारणपणे थंडीची चाहूल लागते.

मात्र, यंदा नोव्हेंबरचा अर्धा महिना उलटूनही दुपारचे तापमान जास्त असल्याने उन्हाचा त्रास कायम आहे. पहाटे थंडी जाणवत असली, तरी दुपारी उन्हामुळे उकाडा वाढत आहे. त्यामुळे नागरिकांना दिवसाच्या वेगवेगळ्या वेळी बदलत्या हवामानाचा सामना करावा लागत आहे. दरम्यान, आज राज्यातील कमाल आणि किमान तापमानात चढ-उतार कायम राहण्याची शक्यता हवामान विभागाने व्यक्त केली आहे. त्यामुळे पुढील काही दिवस राज्यात सकाळी गारवा आणि दुपारी उन्हाचा चटका अशीच स्थिती राहण्याची शक्यता आहे.