राज्यात होणाऱ्या विधानपरिषदेच्या (maharashtra vidhan parishad election) ११ जागांसाठी भाजपकडून ५ जणांची नावं जाहीर करण्यात आली आहेत. यामध्ये पंकजा मुंडे (Pankaja Munde), योगेश टिळेकर, परिणय फुके, अमित गोरखे आणि सदाभाऊ खोत (Sadabhau Khot) यांच्या नावाचा समावेश आहे. जातीच्या समिकरणावर विशेष करून भर देण्यात आल्याचे पाहायला मिळत आहे. आगामी विधानसभा निवडणूक डोळ्यासमोर ठेवून ही नावं समोर आली आहेत. पंकजा मुंडे ओबीसी चेहऱ्यातील महत्वाचे नाव होते. मराठा आणि ओबीसीच्या वादामुळे पंकजा मुंडेंचा लोकसभा निवडणुकीमध्ये पराभव झाला होता. त्यामुळे पंकजा मुंडेंचे पुनर्वसन करण्यात यावे अशी चर्चा होती. अखेर त्यांना विधानपरिषदेवर घेण्यात आले आहे. अजित पवार गटाकडून २ नावं आणि शिंदे गटाकडून २ नावं फायनल झाली आहेत. ही नावं काही वेळात जाहीर होतील. हे सर्वजण उद्या उमेदवारी अर्ज दाखल करणार आहेत. दरम्यान, विधान परिषदेच्या ११ जागांसाठी येत्या १२ जुलै रोजी मतदान होणार आहे. त्याच दिवशी निकाल जाहीर होणार आहे.